Shillong, Nailur 25 : Arngut ki Nongkhaii droks kila la pynngat hapoh ka kyndon Prevention of Illicit Traffic in Narcotic Drugs and Psychotropic Substances Act (PITNDPS Act), kila ioh ia ka jingpynsajia da kaba set along haduh shisnem kynthih khlem jamin.
Kane ka dei ka sien ba nyngkong ba ki nongkhaii droks kin ngat ia ka jingpynsajia ba kot haduh 1 snem ha along nar na ki kam khaii droks hapoh ka Jylla.
Ia kane la pyntip da u Myntri ka Tnad Social Welfare ka Jylla Bah Paul Lyngdoh haba pyntip ba kine ki arngut ki dei ki nongkhaii droks kiba la ioh kem bunsien.
Kine ki arngut ki dei u Hubert Lamphrang Paliar ba na ka shnong Pyndengrei, Nongstoin, West Khasi Hills bad u Pynhoi Nongtdu ba na Nartiang, West Jaintia Hills.
U Myntri u pyntip ba kat kum ki kyndon ka PIT-NDPS Act, ka jingpynsajia ia ki nongkhaii droks ka long ka jingset along ba kot hadpeng shisnem haduh 3 snem khlem ka jamin.
U pyntip ba ki don haduh 9 tylli ki mukotduma kiba dang iaid mynta hapoh ka jingbishar jong ka Advisory Board ka PIT-NDPS bala khlieh da u Judge bala shngthait ka High Court.
