Shillong, Lber 26: Ka Prof. Sherwin M. Sungoh, kaba la shah thung kum ka Pro Vice-Chancellor jongka North-Eastern Hill University (NEHU) kala shimti naduh ka 21 tarik u Lber ia katei ka kam bad kala pyntip ruh sha ka Ministry of Education (MoE) jong ka Sorkar India bad sha ka Sorkar Jylla halor ka jingmynjur ka jongka ban shimti ia katei ka kam ban pyniaid ia ka skulbah kaba don hapdeng ka kynrum kynram.
Ka Prof Sherwin kala shah thung kum ka Pro VC ha u Naiwieng 2024 hynrei kam shym la treh ban shimti ia katei ka kam namar ka jingmih ka kynrum kynram hapoh ka skulbah NEHU khamtam ha kaban pynpaw ia ka jingsngewlem ia ki samla pule kiba don hapdeng ka jingiakhih da kaba shah thngan. Hynrei naduh ba u VC ka NEHU u Prof PS Shukla ula shim shuti naduh ka 3 tarik u Lber, 2025 ka jingtreikam jong ka skulbah kala shah ktah jur, la ka long ha ka pule puthi, ka kam pisa pilain bad ka jingpyniaid ia ka skulbah bad kiba bun ki jingshim ia ki rai kiba long kongsan kila sahteng noh.
“Namar ka jingdonkam ban wanrah biang ia ka jinglong jingman kaba biang bad ba kan ym don ka jingktah ia ka lawei jong ka pule puthi jong ki samla pule hapoh ka skulbah, kumta ka Ministry of Education (MoE) kala iakren bad ka Prof Sherwin ha ka 20 bad 21 tarik u Lber ha kaba kala kyntu ba kan shimti noh ia ka kam na ka bynta ka bha ka miat jong ka skulbah baroh kawei. Hadien ka jingiakren bad ki heh ophisar ka sorkar jylla, kiba la banjur ia ka jingkongsan ban don ia ka nongialam ha kane ka khyllipmat kaba kongsan, ka Prof. Sungoh kala shim ia ka rai ban shimti kum ka Pro Vice-Chancellor bad kala pyntip ruh ia katei sha ka MoE jong ka Sorkar Pdeng” la pyntip u PRO jong ka NEHU u Dr David Pyngrope ha ka kyrwoh khubor hynne ka sngi Balang.
Katkum ki kyndon jongka University Statute (Statute 2A(5)(i)), ka Prof. Sungoh kan shimti ban pyniaid ia ki kam jong u Vice-Chancellor u bym don ha ka skulbah bad kan pyniaid ia katei ka kam tad haduh ba u Prof. Shukla ula wan ban shimti biang ia ka jingkitkhlieh.
Kumta kum ka Pro Vice-Chancellor kaba la rangbah duh ha ka skulbah, ka Prof Sungoh kala shah pynkup bor ban treikam pura kum ka Vice-Chancellor namar ka jinglong jingman jong ka skulbah.
Ka Prof. Sungoh kala pynpaw ia ka jingsngewnguh ia ka Ministry of Education, ka Sorkar Meghalaya bad ia u Member of Parliament ka Lok Sabha na Meghalaya ia ka jingsngewkhia halor ka kynrum kynram kaba la mih ha skulbah NEHU. Kala pynpaw ruh ba kadei ka jingiatreilang jong baroh ki nonghikai kiba la ih ha ka kam bad ki ophisar kiba kynthup ia u Prof. Saha (senior-most Professor), Prof. S. Umdor (In-Charge Controller of Examinations and Finance Officer) bad B. Rynjah (In-Charge Registrar), kiba la trei shitom ban pynthikna ba ki kam ki jam ha ka skulbah kin iaid beit shakhmat ha kine ki 5 bnai kiba la dep.
Ka Prof. Sungoh kala kyntu ia baroh kiba donbynta lang ha ka NEHU ban iatreilang bad ban ai ia ka jingkyrshan ban pynneh pynsah ia ka jinglong jingman jong ka skulbah bad kala pynapw ba ka iengskhem ban buh hakhmat eh ia ka bha ka miat jong ki samla pule bad ia ka bha ka miat jong ka skulbah baroh kawei ha kum kane ka khyllipmat kaba ka mad ia ka jingeh.
 kala shimti naduh ka 21 tarik u Lber ia katei ka kam bad kala pyntip ruh sha ka Ministry of Education (MoE) jong ka Sorkar India bad sha ka Sorkar Jylla halor ka jingmynjur ka jongka ban shimti ia katei ka kam ban pyniaid ia ka skulbah kaba don hapdeng ka kynrum kynram.){kind=link}