Shillong, Nohprah 07 : Ka Bharatiya Janata Party (BJP)-Meghalaya kala pyntip ba kan sa leit iakren sha Delhi ban pynthikna ba ka Sorkar Pdeng ban buh noh ia ki Centre thoh eksamin thungkam ha Jylla lada don kino kino ki eksam pynrung kam ha ki Tnad ka Sorkar Pdeng kiba don hapoh ka Jylla Meghalaya.
Ia kane la pyntip da Nongialam bad Myntri Sorkar Bah Sanbor Shullai hadien ka jing iakynduh ia ki bor pyniaid ka North East Indira Gandhi Regional Institute of Health and Medical Sciences (NEIGRIHMS) hynne ka sngi Balang ha ka jingiadon lang ki Nongialam ka Bharatiya Janata Youth Morcha (BJYM).
Kane ka jingleit iakynduh ka long ruh halor ka jingpynlong ka NEIGRIHMS ia ki eksamin thungkam Nos shabar ka Jylla Meghalaya kynthup ha Assam, ia kaba la pynsangeh noh da ka Sorkar Assam.
Haba iakren bad ki nongthoh khubor, u Bah Sanbor ula pyntip ba shen ki Nongialam ka BJP na Jylla kin sa leit sha Nongbah Delhi ban iakynduh ia ki Myntri Sorkar bad ban iakren ba ka Sorkar Pdeng kan buh noh ia ka centre thoh eksamin thungkam ha Jylla lada don kano kano ka jingpynrung kam ha ki Tnad Sorkar Pdeng ba don ha Jylla.
“Ngin dawa ba nangne shakhmat, ia ki exam ne interview pynrungkam dei ban leh beit ha kane ka Jylla namar kiba bun ki pyrshah khamtam ha ka ba iadei bad ka jinglut jingsep bad ka jingsngain jong ki samla wad kam” ula ong.
Une u Myntri Sorkar ula pyntip ba ha ka jingiakren bad ki bor pyniaid ka NEIGRIHMS, la kyntu ruh ba nangne shakhmat kane ka Institute ka dei ban pynlong noh ia kino kino ki eksam thungkam hapoh ka Jylla ym shuh shabar ka Jylla kumba leh ia ka kam thung nos.
U vice president ka Bharatiya Janata Yuva Morcha (BJYM) Bah Wallambok Khongwir u la ong ba na ka liang ka BJP kala kyntu ia ki bor pyniaid ka NEIGRIHMS bad ki company kiba shim ia ka kam ban pynbiang ia ki nongtrei, ba na ka bynta ki samla jong kane ka Jylla ia ki interview dei ban leh beit hangne hapoh ka Jylla.
