Shillong, K’lyngkot 07 : U Chief Secretary ka Jylla Bah DP Wahlang ha ka sngi Ba-ar ula ong ba ki Regional Committee ki lah ban shimpor ban aiti ia ki kaiphod halor ki 6 tylli ki jaka ba dang sah ban pynbeit ia ki jingiakajia namar ka jingwan jong ka elekshon MDC ha Ri-lum Khasi bad Jaintia.
Haba kren sha ki lad pathai khubor, u Bah Wahlang ula ong “Ngi la don ki Committee hynrei ka Phase-II, ngi la hap ban pynjlan sha ka 31 tarik Lber bad ngi kyrmen ba ia ka kaiphod yn sa aiti noh hapoh katei ka por”.
“Hynrei mynta da ka jingpynbna ia ka elekshon District Council, ki Chairmen bad ki dkhot jong ki Committee kila bunkam bad ka jingleit ialap elekshon bad lehse ki donkam katto katne ka por hynrei ki kam kila iaid ha ka lynti kaba dei” ula bynrap.
Halor ka jingpyntreikam ia ka rai bala shim haba iadei bad ka phase-I jong ka jingiapynbeit pud bad ka Assam, u Chief Secretary ula ong “Ka rai ba khatduh ban pynieng ia u mawpud kala urlong mynta ha kitei ki jaka”.
“Nga la shong jingialang bad u Chief Secretary ka Assam bad ia kane ka jingialang la pyniaid da u Home Secretary kaba la long ha u bnai Naiwieng ban shong bishar ia ka rai ba khatduh halor ka phase-I jong ka kam pynbeit pud” ula bynrap.
