Nagaland | Kyan ka jingiakynad pher jaidbynriew ba dawa khang ka Maova ia ka rally ka CPO

Chümoukedima, Naitung 16: Ki jingïakynad ka la mih ha ka thaiñ Medziphema, Nagaland, hadien ba ka Maova Village Council ka la dawa ïa ki bor pyniaid district bad ki pulit ban pynsangeh ïa ka jingthmu iaid paidbah ne rally da ka seng Chakhroma Public Organisation (CPO), haba maham ba ka lah ban pynthut ïa ka jingïatylli ha ka jaidbynriew bad pynmih ïa ki jingkulmar ba thymmai.

Ha ka jingai jingmut ba la aiti sha u Commissioner of Police, Dimapur, u Deputy Commissioner of Chümoukedima bad ha u Additional Deputy Commissioner of Medziphema, ka council ka la pyrshah ïa ka jingthmu jong ka CPO ban pynlong ïa ka rally ba jai jai ha ka 17 tarik u Naitung, da kaba kynnoh ba ka dei kaba la thmu kyrpang pyrshah ïa ka shnong Maova bad ka lah ban pynmih ia ka jingshun, ka jingtieng bad ka jingpyniapher jaitbynriew.

Ka council ka la maham ba ka jingpynlong ia ki briew pyrshah ia kawei ka shnong ka lah ban pynar tatien ia ka jingbym shaniah, ban pynmih ia ki jingsngew bad ban buh jingma ia ka jingsuk ha katei ka thain.

Kane ka jingkyrpad ka wan hadien katto katne bnai ba la mih ka jingïakynad kaba jur hapdeng ka Shnong Maova bad ki dkhot jong ka jaidbynriew Chakhroma halor ka jingïakajia jaka ha u bnai Rymphang.La iathuh ba katei ka jingialeh ka la pynlong ia ki katto katne ngut ki briew ban mynsaw bad pynjulor ia ki iing ki sem, ki kali bad kiwei kiwei ki mar ki mata, ha kaba baroh arliang ki dang iai bteng ban pynneh ia ki jingmut bapher bapher jong katei ka jingjia.

Da kaba wad ïa ka jingïarap mardor, ka village council ka la kyntu ïa ka bor pyniaid district ban ym ailad ïa ka rally, ban khanglad ïa kano kano ka jingïalang kaba lah ban pyntieng ne pynkhihwin ïa kano kano ka jaitbynriew, ban pynkhlaiñ ïa ka jingpahara hapoh bad sawdong jong ka Shnong Medziphema bad Maova, bad ban pynneh ïa ka rukom treikam kaba hok bad kaba khlem shah liang ha kaba ïadei bad ka jingïakynad.Ka la khot ruh ia ka jingiakren bad ki lad pynbeit ia ki jingiakynad kiba long katkum ka ain ha ka jaka jong ki jingiakhih paidbah kiba lah ban pynjylliew shuh shuh ia ki jingiapher jingmut.

Ka council ka la pynkynmaw ïa ki bor pyniaid district ïa ki jingpynpaw jong ka kiba kham mynshwa ban leh eiei ïa ka nongleh pyrshah ïa kito kiba la kynnoh ba ki donkti ha ka jingïakynad ha u bnai Rymphang, da kaba pynskhem ba ïa ka jingsuk lah ban ïoh tang lyngba ka jingsynshar kaba khlem shah liang, ka jingbud ryntih ïa ka synshar aiñ bad ka jingïakren kaba tei.

Ka jingthmu ban pynlong ia ka jingialang jong ka CPO la buh ban long ha ka sngi Thohdieng, ha kaba ka bor synshar ka khmih lynti ba kan shim ia ka rai hapdeng ka jingeh kaba jur bha ha ka liang ka jingshngain.