Kohima, Nailur 27: Ka Sorkar Pdeng kala pynjlan biang sa hynriew bnai ia ka jingtreikam jong ka Armed Forces (Special Powers) Act 1958 (AFSPA) ha ki katto katne ki bynta jong ka Jylla Arunachal Pradesh bad ka Nagaland, ka ban sdang naduh ka 1 tarik Risaw.
Ha ka sngi Ba-ar, ka Home Ministry (MHA) kala pynjlan biang ia ka jingtreikam ka AFSPA ha ki katto katne ki jaka jong kine ki artylli ki Jylla.
Kat kum ka jingpynbna ka MHA, ia ka AFSPA la pynjlan sa hynriew bnai ha Dimapur, Niulang, Chumoukedima, Mon, Kiphire, Noklak, Phet bad Peren District ka Nagaland bad ki jaka kiba hap hapoh ka Khuzama, Kohima North, Kohima South, Zubza bad Kezocha police stations ha Kohima district.
La pynjlan ruh ia ka AFSPA ha Mangkolemba, Mokochung-I, Longtho, Tuli, Longchem bad Anaki ‘C’ police stations ha Mokokchung District, Yanglok police station ha Longleng District, Bhandari, Champang bad d Ralan police stations ha Wokha District, Ghatashi, Pughoboto, Satakha, Suruhuto, Zunheboto bad Aghunato police stations ha Zunheboto District ka Nagaland.
Namar ka jingnang wanphai ka jingshongsuk ha ka thain Shatei Lam Mihngi, ka Sorkar Pdeng naduh u bnai Iaiong 2022, kala nang pynduna ia ki jaka bala pynhap hapoh ka Disturbed Area ha Jylla Nagaland, Assam bad Manipur.
La weng noh ia ka AFSPA na Tripura ha u snem 2015, ha Meghalaya ha u 2018 bad ha Mizoram ha u snem 1980.
Ka AFSPA 1958 ka dei ka ain jong ka Parliament ba aibor kyrpang ia ki shipai ba kin pynneh ia ka shongsuk shongsain ha ki jaka bala ithuh kum ki Disturbed Areas.
 Act 1958 (AFSPA) ha ki katto katne ki bynta jong ka Jylla Arunachal Pradesh bad ka Nagaland, ka ban sdang naduh ka 1 tarik Risaw.){kind=link}