Guwahati, Lber 07 : Ka Konyak Union kala pynbna da ka Public Emergency ba treikam mardor ha baroh u pud u sam jong ka Kanyak Union hadien ba ka Sorkar India kala pynslem ban jubab halor ka jingpynkha ia ka Frontier Naga Territory (FNT) lyngba ka Ministry of Home Affairs (MHA).
Kum shibynta jong ka jingbthah ka Eastern Nagaland Peoples’ Organisation (ENPO), ka KU kala pynbna ia ka Public Emergency ban iakhih pyrshah ia ka jingslem ban pynbeit ia ka jingtyrwa ban pynkha ia ka Frontier Naga Territory da ka Sorkar India.
Ka Konyak Union kala pynbna ban pyrrkhing ia ka jingpyntreikam ia ka Chen Moho Resolution jong ka 23 tarik Rymphang 2024, kaba ong ban nym iashimbynta ha kino kino ki elekshon ka Sorkar Pdeng ne ha Jylla tad haduh ban da pynbeit ia ka jingtyrwa ban pynkha ia ka FNT lyngba ka MHA.
Ki paidbah kin nym pdiang ia kano kano ka jingkurlar da ka MHA ban pyntreikam hadien ka elekshon Lok Sabha.
Kum shibynta jongkawei pat ka sienjam ban pynjur ia ka jngiakhih na ka bynra ka FNT, kan sa don ruh ka jingpakhang shnong miet ha baroh kawei ka Mon District ha ka 8 tarik Lber 2024 ia kaba yn pynlait ia ki eksam ki samla pule, ka jingiakyntiew kurim, ba pang ba shitom, ba pluh iing, bad ki lad pathai khubor.
“Ki jingiakhih ki nang jur katba nang iaid ki sngi tad haduh ban da pynurlong ia ka FNT kumba la kular da ka GOI/MHA. Ha ka por jong kane ka Public Emergency, kam dei ban don kano kano ka jingiaid ialap elekshon da kino kino ki seng sain pyrthei hapoh u pud u sam ka Mon District. Kino kino kiba ialeh pyrshah kin shim hi iala ka jong ka jingkitkhlieh” ong ka Konyak Union.
