Kohima, Lber 04 :U nongialam ka Nationalist Democratic Progressive Party u Neiphiu Rio u la phah ia ka shithi iehnoh kam kum u Myntri Rangbah (CM) ka Nagaland sha u Lat ka jylla u La Ganesan mynta ka sngi 4 tarik khnang ban plie lynti ha kaba iadei bad ka jingthaw ia ka sorkar thymmai ka ban wan.
U Rio u la phah ia ka shithi iehnoh kam hadien ka jingjop donburom ha kane ka ilekshon assembly kaba dang shu kut shen ha kaba ka kynhun synrop BJP-NDPP kila ioh haduh 37 seat bad palat ia u lain jong ka jingbun paid.
U Rio u la pynrem noh ia u kyrtong ka congress u Seyievilie Sachu na Northern Angami-II constituency.
Ka Nationalist Democratic Progressive Party Legislature Party (NDPPLP) ka Nagaland Legislative Assembly ha ka jingialang kaba nyngkong jong ka party kaba la long hapoh ka central office ha Kohima ka la jied ia u Neiphiu Rio kum u nongialam jong ka bad kyntu ia u ba un iaid shakhmat ha kaba iadei bad ka jingthaw ia ka sorkar kaba thymmai ha ka jylla.
Ha kajuh ka por ka NDPPLP ka la ai ruh ka jingkhublei sha ki paidbah nongthep vote ka jylla Nagaland hadien ba ki la ai biang ia ka jingshaniah sa shisien pat ha ka party NDPP hapoh ka jingialam jong u CM kaba la ioh ia ka jingjop kaba donburom ha kane ka ilekshon assembly kaba dang shu kut shen.
Ha kawei pat ka liang u nongialam ka Nationalist Democratic Progressive Party (NDPP) u TR Zeiliang u la ong ba ia kane ka sorkar thymmai lah ban pyntian smai ha ka 7 tarik mynta u bnai.
Shuh shuh une u nongialam ba la rim u la ong ruh ba ki katto katne ki nongialam ka party NDPP kaba kynthup ia u CM Rio kin sa shah khot sha Delhi ha kine ki shi sngi ar sngi ki ban wan na ka bynta ka jingialang bad ki nongialam ka BJP hashwa ka jingpyntian smai.
