Guwahati, Rymphang 5: Ka sorkar India ha ryngkat ka sorkar Nagaland bad ka Eastern Nagaland Peoples’ Organisation (ENPO) ha ka sngi Palei kila ia soi ia ka jingteh kular ban thaw ia ka Frontier Nagaland Territorial Authority (FNTA) — kaba dei ka mat dawa ba la sahteng jong ka Eastern Nagaland.
Katei ka soskular, kaba la iasoi ha ka jingiadon lang u Myntri kam pohiing Amit Shah bad u Myntri Rangbah ka jylla Nagaland, u Neiphiu Rio, kan ai sha ka FNTA ia ka bor synshar halor ki 46 tylli ki sobjek ha ki 6 tylli ka Eastern District— ka Tuensang, Mon, Kiphire, Longleng, Noklak bad Shamator.
Ia kane ka sienjam la khmih lynti ba ka long kaba kongsan ban weng ia ki jingeh kiba la neh da ki phew snem jong ka thain, kaba la ju pynpaw ia ka jingsngewkhia halor ka jingbym lah ban roi bad ka jingbym biang ka jingmih khmat naduh ba la thaw ia ka Nagaland.
Hapoh kane ka jingiasoi thymmai, ka sorkar pdeng kan mang pisa kaba la buh thikna man la u snem na ka bynta ban kyntiew ia ka Eastern Nagaland. Ka Union Ministry of Home Affairs ruh kan bah ia ka jinglut jingsep ha kaba sdang ban seng ia ka FNTA, kynthup ia ka jingbuh ia ka mini-secretariat kaba la khlieh da u Additional Chief Secretary lane u ophisar ha ka kyrdan Principal Secretary.
Ka jingpynlut na ka bynta ka jingpynroi jong ka thain kan long katkum ka jingbun briew bad ka jingheh ka jaka jong ka, ban pynthikna ia ka jingtuid pisa kaba ryntih bad kaba neh. Kaba kongsan ka long ba katei ka jingiateh kam pynkylla ne ktah ia ki kyndon jong ka Article 371(A) jong ka Riti Synshar, kaba ai jingiada kyrpang ia ka Nagaland.
U Amit Shah u la niew ïa kane ka jingsoi kum ka “sngi kaba donkam bha” ha ka jingïaid lynti jong ka thaiñ shatei lammihngi sha ka jingsuk bad kaba lait na ki kam kiengatiar. U la ong ba ka sorkar ka angnud ban pynbeit ia baroh ki jingiakynad lyngba ka jingiakren bad ki rukom synshar paidbah.
U Shah u la kdew ba naduh u snem 2019, ka Sorkar pdeng ka la ïasoi ïa ki 12 tylli ki jingïateh soskular iasuk ba kongsan ha ka thaiñ Shatei Lammihngi ban weng ïa ki jingïakynad kiba la slem bha bad ki jingdawa jong ka thaiñ. U la pynthikna ïa ki nongmih khmat jong ka ENPO ba ka Sorkar India kan kyrshan pura ïa ka roi ka par jong ka Eastern Nagaland bad kan kit ïa ka jingdonkam jong ka.
Ka ENPO kaba mih khmat ia ki 8 tylli ki jaitbynriew Naga na ki hynriew tylli ki distrik jong ka Eastern Nagaland, ka la dawa da ki snem ia ka jingpynbeit kyrpang ia ka synshar khadar da kaba kdew ia ka jingbym shim khia ha ka ioh ka kot bad ka jingbym don ki lad ki lynti.
Ka jingthaw ia ka FNTA la iohi kum ka jingia pynbeit ha ka sain pyrthei — ban sangeh noh ia ka jinglong jylla kaba pura hynrei ban ai ia ka jingsynshar laitluid kaba kham bha ha ka liang ka synshar khadar bad ka pisa tyngka kaba thmu ban pynsted ia ka jingpynroi ia ki jingtei, ka jingroi ka ioh ka kot bad ka jingsynshar kaba bha. Ki heh sorkar ki la ong ba kane ka jingiateh ka thmu ia ka jingshim rai kaba kham kloi, ka jingpyndonkam ia ki marpoh khyndew kaba kham bha bad ka jingpynroi kaba pynleit jingmut katkum ki jingdonkam jong ka thain Eastern Nagaland.
Ha kane ka jingiasoi ia kane ka jingiasoi la don lang u Deputy Chief Minister u Yanthungo Patton, u Member of Parliament (MP), bad ki heh ophisar na ka tnad Union Home Ministry bad na ka sorkar Nagaland.
 ha ka sngi Palei kila ia soi ia ka jingteh kular ban thaw ia ka Frontier Nagaland Territorial Authority (FNTA) — kaba dei ka mat dawa ba la sahteng jong ka Eastern Nagaland.){kind=link}