Kohima, Rymphang 23 :Ka kynhun kieng atiar kaba la shah khein beain ka National Socialist Council of Nagaland (NSCN-GPRN) ka la hukum ia ki paidbahjong ka 30 Alongtaki Assembly Constituency ba kim dei ban jied ia u president ka BJP ka jylla u Temjen Imna Along ha kane ka ilekshon assembly ka ban wan.
Ha ka shithi ba la phah da ka NSCN-GPRN ka la hukum ia ki nongshong shnong jong katei ka constituency ba kin bud ia kane hukum, ka la kam ruh ba u Temjen Imna Along u dei u dkhot jong ka RSS.
“Katkum ka hukum jong u Kilo Kilonser jong ka NSCN/GPRN ha kaba iadei bad kane ka ilekshon ka ban wan, la hukum ia baroh ki nongshong shnong kiba hap hapoh ka 30 Alongtaki constituency Assembly ba kin bud ryntih ia kane ka hukum namar ki daw ba la kdew harum.La ioh jingtip ba u Temjen Imna Along u dei u dkhot ba shitrhem jong ka seng RSS bad u la pyrshang katba lah ban pynrung hapoh ka khyndew ka jong ngi ia ka niam Hindu ha kaba ma ngi ki Naga ngi la don ka jingiateh bad U Blei ba ka Nagaland ka dei na ka bynta u Khrist,” ong ka shithi.
Nalor kata ka la kam ruh ba ha u snem 2022 ha Amsterdam, ka sorkar India ka la ithuh ia ka jinglong kyrpang ha kaba iadei bad ka histori jong ki jaidbynriew Naga, hynrei u Temjen Imna Along khlem kano kano ka jingpyrkhat u la ong hapoh ka assembly ka Nagaland ba ki Naga ki dei ki nong India.
Katei ka kynhun ka la kyntu ia ki paidbah ba kim dei ban bud satia ia u Temjen Imna Along bad lada ki leh pyrshah kin ngat ha ka jingshah pynshitom.
“Kumta haba shim halor kane ka jingpynpaw pyrshah Naga, baroh ki shnong kiba hap hapoh ka 30 Alongtaki Constituency la hukum ba kin ymkyrshan ia u Temjen Imna Along ha kane ka ilekshon ka ban wan, bad kiba leh pyrshah kin ngat ha ka jingshah pynshitom katkum ki kyndon jong ka seng NSCN/GPRN,” ong katei ka shithi ba la phah da ka NSCN.
