Kohima, Rymphang 13:U national president jong ka Seng Bharatiya Janata Party (BJP) u JP Nadda un pyllait paidbah ia ki mat treikam (manifesto) na ka bynta ka ilekshon assembly ha Nagaland ha ka jingialang ka ban long ha ka 14 tarik mynta u bnai.
Katkum ki tyllong khubor, une u president ka BJP un pynlong ka jingwan jngoh sha Nagaland lashai ka 14 tarik Rymphang bad un iashim bynta ruh ha ka rally jong ka seng BJP bad ka party synrop NDPP.U Myntri Rangbah (CM) ka jylla u Neiphiu Rio ruh un ia don lang ha kane ka rally.
Ka BJP bad ka NDPP kin iakhun ryngkat lang ha kane ka ilekshon assembly ka ban wan.Katba ka BJP kan iakhun na ki 20 tylli ki seat, ka NDPP kan ia aireng na ki 40 tylli.
Ka jingiathep vote na ka bynta ka ilekshon assembly kaba don 60 ngut ki dkhot kan long ha ka 27 tarik mynta u bnai, katba ka jingniew ia ki vote kan long ha ka 2 tarik u Lber 2023.Ka Nagaland bad ka Meghalaya kin leit sha ka jingiathep vote ha ka 27 tarik mynta u bnai, katba ka jingniew ia ki vote kan long ha ka 2 tarik u Lber u ban wan.
Nalor ki kyrtong shimet, ki don 12 tylli ki party sain hima ki ban ia aireng ha kane ka ilekshon assembly ka ban wan ha Nagaland.
Kiba bun na ki party sain hima ki bym shym la don ha ki kam sain hima sima hapoh ka jylla ki la wan rung ha kane ka ilekshon, bad ka Rising People’s Party, North East Democratic Front, RPI(A) bad ka LJP (Ram Vilas) kin ia aireng ha kane ka ilekshon ha ka sien kaba nyngkong.
Ka Republican Party of India (A) bad ka Janata Dal (United) ki la pyllait ia ka list jong ki kyrtong ha ka 5 tarik mynta u bnai na ka bynta kane ka ilekshon ka ban wan.Ka Naga People’s Front (NPF) ka la pynbna shuh shuh ia ka kyrteng jong sa hynriew ngut ki kyrtong, kaba la kyntiew ia ka jingdon jong baroh ki kyrtong jong ka sha ka 21 ngut, ka Congress ka la pyllait sa sawtylli ki kyrteng jong ki kyntong kaba la kyntiew sha ka 25 ngut baroh.
