Na Tamil Nadu lap ia u rangbah na Meghalaya hadien ka jingjah rngai

Shillong, K’Lyngkot 09: Ka Khasi Students’ Union (KSU) Bengaluru Unit hynne ka sngi Thohdieng, ka pyntip ba kala lap ia u Bah Chaltbha Muksor, u rangbah na Lad Rymbai, East Jaiñtia Hills ba jah rngai la katto katne sngi, bad iathuh ba une u rangbah u don mynta hapoh ka jingpeit jong ka seng.

U Chaltbha uba la mih na la shnong ha ka 2 tarik Kyllalyngkot 2026, ban leit wad kam sha Bengaluru, ula jah rngai ha shiteng lynti bad ki bahaiing ruh kim ioh shuh ban phone ia u hadien bala iakren khatduh ha Jolarpettai Junction Railway Station, Tamil Nadu, ha ka 5 tarik Kyllalyngkot 2026.

Ka KSU Bengaluru Unit hadien ba la pyntip da ka KSU West Jaiñtia Hills Unit bad ka longïing jong u Chaltbha, ka la sdang ïa ka jingwad da kaba pynphriang ïa ki poster, ki dur bad ki jingpynbna paidbah lyngba ki social media.

“Ki pulit ka Krishnagiri Police Station ki la pyntip ïa ngi ba kila lap ia u Chaltbha Muksor ba u la mynsaw bad u la shah sumar ha Government Medical College and Hospital, Krishnagiri” ong u President ka KSU Bengaluru Unit samla Donboklang Nongphud.

“Ngi la pynbeit mardor ben leit sha Krishnagiri ban pynthikna ia ka jingshngain bad jingbha jingmiat jong u Chaltbha” kala ong

U Chaltbha uba la mynsaw na bynta ki kjat bad mynta u don hapoh ka jingsumar jong ka KSU Bengaluru Unit. Ka seng ka pynpaw ka jingsngewnguh ïa ki pulit jong ka Krishnagiri Police Station, ki bor pynïaid jong ka Hospital, bad ki riew shimet kiba la noh synñiang ha ka jingjop ban wad sei ïa u.

“Ngi iaroh ia ka jingshimkhia kaba kloi bad ka jingiatreilang jong u SP bad SI ka Krishnagiri Police Station, bad ki bor pyniaid jong ka Hospital,” ong u samla Donboklang.

“Ngi kyrpad ia ki paidbah ba kin sangeh noh ban pynphriang ia ka jingpynbna ne ki dur ba la dep shaphang jong u Chaltbha bad ban iasam ia kane ka jingpynbna bala lap ia u.