SHILLONG, Iaiong 26: Ka long shisha ka khubor ba sngewtynnad na ka bynta ka long iing bad kumjuh ruh ia ka jylla hi baroh kawei, ha kaba u wei u samla uba la jah na Bengalaru ha ka step 12 tarik mynta u bnai Iaiong, la lap pat na ka jylla Tamilnadu ha ka janmiet jong ka 16 u bnai Iaiong 2025.
Katkum ka kyrwoh khubor na u samla Donboklang Nongphud uba dei u President ka KSU Bengaluru Unit u la iathuh ba une u heprit uba jah na Bengalaru la tip kyrteng kum u Welcome Rasmut uba dei na ka shnong Ummolong, Jowai uba la 16 snem ka rta bad une u heprit u la jah na Kammanahalli, Bengaluru, Karnataka.
Ia u tei u khynnah la shem biang ha ka 16 tarik Ïaïong na TamilNadu da uwei u Pastor bad ki paralok jong u, uba la iarap ban leit buh ia u hapoh ka jingpeit jong ka Child Welfare Committee (CWC) Krishnagiri, Tamilnadu, bad ia une u heprit Welcome Rasmut la aiti noh sha ki bahaing jong u ha Bengaluru ha ka 25 tarik Ïaïong 2025.
Ka jingjah noh u Welcome Rasmut ka la pynlong ia ki baha ïing ha sem bad ki paralok jong u ban syier mynsiem bad sah ha ka jing lyngngoh. Ia u tei u khynnah la iohi khatduh haka step 12 tarik u ïaiong 2025 hadien ba u la mih na ïing sah jong u ban leit mareh step bad la suba ba u la bakla lynti. Ka jingbym lah ban ioh jingtip halor jongjah jong u, ka la pynlong ia ki baha ïing hasem ban phah khubor sha ki pulit bad naka liang ka seng ngi lah phah ki khubor sha ki local newspaper bad haki social media pages.
Lyngba ka jingiatreilang kaba janai jong shibun ki seng bad ki riewshimet, la ioh khubor ba u khynnah u la poi sha Tami Nadu. Uwei u pastor uba shem ia u, u la shim khia bad u la pynpoi ia u sha ka ka jaka ai jingsumar iaki khynnah ka Children Welfare Committee ha Krishnagiri Tamilnadu, kaba la peit bad sumar bha ia u haduh ba la ioh pdiang noh da ki ba ha ïing jong u.
Ka jingioh biang ia u Welcome Rasmut ka long ruh ka sakhi jong ka jingtrei shitom bad jingïatreilang jong ki briew kiba ieit iaki para mynsiem bad kiba don ka jingkitkhlieh.
Kine ki kynthup ia Bah Iada Martin Marbaniang, Pastor A.S. Nongrum jong ka KJCF Bangalore, ki paralok ba iasah marjan, ka NPP Ummawlong Youth Wing, Ka CWC Jowai, ki pulit na Banaswadi Police Station, ryngkat kiba ha ïing ha sem, kiba la shim khia ban pynsaphriang iaka khubor wad jingtip bad ban wad jingïarap.
Ki baha ïing jong u Welcome Rasmut ki ai ka jingsngewnguh kaba khraw sha baroh kiba la noh synñiang, kiba la kynmaw lem haki jingduwai bad kiba la kyrshan lem hakum kane ka por ba ki iakynduh iaki jingeh.
