Shillong Naitung 22: Kadei ka khana ka jingdon ia ka thong bad ka jingseisoh, haba u Myntri Rangbah ka jylla Conrad K Sangma, ula leit dalade ban jngoh ia ka ri Japan ban iakynduh ia ka kynhun jong ki Nurse kiba tbit jong ka jylla kiba la jam shakhmat ban ioh ia ka jingkylla ha ka jingim ka jongki.
Kitei ki Nurse, ki don mynta ban trei ban ktah ha Kobe, Japan, kaba long ka jingpynshisha ia ka bor jong ka jingkylla ia ka kabu bad ia ka jingshah shitom, kaba la lam da ka sienjam kaba la iohi jngai da ka Sorkar Meghalaya.
Ka khana kala sdang ha u Jymmang 2023, haba ka sorkar kala pynlong ia ka Job Fair ha Shillong, da kaba thmu ban pyniasoh ia ka jingdonsap ki Nurse ka Meghalaya bad ki kabu ha kane ka pyrthei. Palat 1300 ngut ki Nurse kila iashimbynta kiba don ia ka jingthrang ban pyni ia ka sap ka phong ka jongki. Lyngba ka jingiatreilang bad ki HR Company kiba na kylleng ki ri, kane ka sienjam kala long kaba seisoh. 27 ngut ki Nurse kila ioh ia ki jaka ban trei hapoh ka ri Japan katba 18 ngut pat kila ioh ia ka kabu hapoh Singapore.
Ha ka jingleit jngoh ka jongu ia ka Kobe, ia u Myntri Rangbah la synran da ki ophisar jong ka tnad ka Health & Family Welfare, kila iakynduh ia ki Nurse ban pynthikna ia ka rukom long rukom man ka jongki. Kane ka kynhun, ha ka wat ka baar kaba la don ha ri Japan, kala pynpaw ia ka jingsngewsarong bad jingsngewnguh. Napdeng kine, kadei ka Laikyrmen Khardewsaw, ka Nurse ha Kobe Kaisei Hospital, kaba na shnong kaba rit na Umtrewsaw ha Ri Bhoi district.
“Ka lynti ka jong nga na ka shnong sha ri Japan kadei kaba dap da ki jingeh hynrei lyngba ka jingkyrshan jong u Blei, ka iing ka sem bad ki paralok kala long ka jingiaid kaba sngewtynnad. Nga dang im ryngkat bad ka jingangnud ka jong nga hapoh Kobe” kala ong.
Sa kawei pat ka Nurse ka Jenisha Lyngdoh kaba don ha Kobe Kaisei Hospital, kala pynpaw ia ka jingsngewnguh, “Nga ai khublei ia u Myntri Rangbah u Conrad K Sangma bad ia ka kynhun jongka MSSDS halor kane ka jingai ia ka kabu kaba khraw tam. Ban trei ha Japan kadei ka jingangnud ia ngi kiba bun bad lyngba ka jingkyrshan ka jongki, ngi la ioh ia ki jinghikai bad ia ka jingtbit kaba khyrhai kaban saindur ia ka lawei ka jong ngi”.
U Myntri Rangbah da ka jingshah ktah ha kitei ki khana kiba la pynsngew da ki Nurse, ula pynpaw ia ka jingsngewhun jrut ia ka jingseisoh jong katei ka prokram.
“Ngi dap da ka jingkmen ban iohi ia ka jinglong jingman kaba biang bha bad kaba ioh ia ka jingkyrshan hapoh ka Kobe Kaisei Hospital. Ki Nurse ki jong ngi ym tang ba ki lah ban im ryngkat ha katei ka jinglong jingman hynrei kila trei shitom bad ka jingangnud ka jongki. Kane kadei ka kabu ksiar na ka bynta kito baroh kiba don ia ka sap ka phong kaba tbit ha ka pyrthei” ula ong.
Kane ka sienjam ka long palat ban ia ka prokram ban shu pyniohkam pyniohjam, kadei ka jingtbeh ia ka jingkyrmen kaba pyni nam kumno ka jingiohi jngai, jingiatreilang bad ka jingiai shah ka lah ban pynkylla ia ka jingim.
Na ki shnong na Meghalaya sha ki hospital ha ka ri Japan, khublei shibun ia ka jingiohi jngai jong u Myntri Rangbah u Conrad K Sangma bad ka jingskhem jingmut jong ki Nurse, mynta kila thoh ia ka khana jong ka jingjop, kaban ai mynsiem shuh shuh ia kiwei ruh ban don ia ka jingangnud.
