Shillong, Naitung 13: U MLA ka BJP na South Shillong Constituency u Bah Sanbor Shullai hynne ka sngi Saitjain, ula ai jingiarap da ka song tyngka lyngba ka tulop MLA ka jongu, sha ki 6 ngut ki khynnah kiba don jingduna haka dkhot met kiba la wan shakhmat ha ka jingpule bad ha ki kam ialehkai kaba kot T.2 Lak.
Ia kitei ki 6 ngut ki samla kiba don jingduna haka dkhot met, la pynkup burom da ka Raid Laban Sports, Social and Culutral Organisation (RLSSCO) ha State Convention Centre Shillong.
U Bah Sanbor Shullai haba kren ha ka jingialang ula ai jingroh ia kine ki samla ba watla ki don hapdeng jongka jingduna ka dkhot met hynrie kila paw ha ka kam ialehkai bad kumjuh ha ka pule puthi bad ula kitbok ia ki ba kin dang iai bteng ban trei shitom ban pynurlong ia ka jingangnud ka jongki.
U Bah Sanbor ula pynbna ruh ba kane ka jingai jingiarap ka jongu kadei na ka tulop kaba u ioh kum u MLA ka South Shillong Constituency bad kumta kum ka dak jong ka jingpynshlur ia kine ki samla ula ai jingiarap T.1 Lak sha ka samla Prisca Pyngrope kaba na Laitumkhrah, Shillong kaba la shah jied ban mihkhmat ia ka ri India ban iashimbynta ha ka jingiakob khunkti ne Armwrestling & Para Armwrestling kaban long ha dewbah Europe mynta u snem.
Nalor kane la pynkup burom ruh da kaba ai mar T.20 Hajar ia ka samla Aisilda Thabah kaba na Nongstoin, West Khasi Hills bad ia u Novenius Roiky Dkhar uba na Madan Kynsaw na West Jaintia Hills, kiba la wan baar haka National Armwrestling & Para Armwrestling Championship 2024.
La pynkup burom ruh ia ka Ankita Das kaba na Lumparing, Shillong, ka Syrpailin Wahlang na Nongstoin, West Khasi Hills bad usamla Skhemlang Lyngdoh Nonglait na Umlatar, Ribhoi District kiba la wan shakhamt ha ka jingpule bad ha ki kam ialehkai.
