Shillong, K’lyngkot 15 : Ka jingniah kali arshaka khyllew sap ne stunt, kala lam sha ka jingmynsaw jur jong uwei u briew ba niah scooty ha surok Umsawli ba marjan ka National Insitute of Fashion Technology (NIFT) hynne ka sngi Nyngkong.
Kat kum ka video bala saphriang online, uwei u nongniah thuk thuk ula khyllew sap ha kane ka surok hynrei namar ka jingsted bad jingkhun jong ka surok, une u briew u khlem lah shuh ban tehlakam ia ka thuk thuk ba u niah, kaba la kyllon bad leit rat ia kawei pat ka scooty kaba dang wan mar pyrshah.
Ka jingiatakhuh ka long kaba la jur bha haduh ba une u nongniah scooty ula her shajrong bad hap ha surok hapdeng ka jingmynsaw. Ia une u briew la kit noh sha NEIGRIHMS ban ai jingsumar.
