Shillong, Nohprah 16: “Na ka jingdum sha ka jingshai” ka dei ka khubor jong kawei ka Shnong ka Ri-lum Khasi Jaintia ban rakhe ia ka Khristmas ha ka rukom kaba pher bad ba shongkun bha bad kane ka Shnong ka dei ruh kaba la pawnam ha ka liang ka jingpynkhreh pynkhrum ia kane ka Sngi ka jingwan long briew u Jisu Khrist, da ka jingiamih ryntih bad ialong kawei hapdeng ki Nongshongshnong khlem da khein niam ne kiei kiei baroh.
Kane ka Shnong ka dei ka shnong Moolamylliang kaba don ha East Jaintia Hills District, kaba jngai kumba 112 Km na Shillong bad 15 Km na Khliehriat, Headquarter ka East Jaintia Hills.
Kane ka Shnong ka dei ruh kaba la pawnam kum kawei na ki shnong kaba khuid tam ha Ri-lum Jaintia bad ka shnong kaba la plan bha ha ka rukom pynlong Shnong, khamtam eh ka jingieid ia ka mariang kaba la paw na ka jingiashimbynta ki nongshongshnong ban pynneh ia ka jingjyrngam ka Shnong da kaba thung ia ki dieng ha shilynter ka shnong naduh ki lynti iaid kjat, ki surok iaid kali bad ki jaka ba lait.
Ka Dorbar Shnong Moolamylliang mynta u snem ruh kala pynkhreh ia ki prokram bapher bapher ban pynrung ia ka mynsiem lehkmen Khristmas bad u Snem Thymmai kaba pher bha hapoh ka Shnong kaba la pynkhreh pynkhrum ha kata ka rukom ka ban pyniphuh iphieng bad pynshongkun bha.
Kane ka Shnong kan ot ribbon ia ka jingleh kmen Khristmas naduh ka 18 tarik Nohprah ha ka por 5 baje janmiet, ka ban neh haduh ka 3 tarik Kyllalyngkot, 2024.
Ia kane ka jinglehkmen ka Dorbar Shnong, yn plie paidbah da u MP ka Rajya Sabha Dr WR Kharlukhi ha ka 18 tarik kum u Kongsan ha ka jingiadonlang ka MLA ka Sutnga-Saipung Kong Santa Marry Shylla kum ka symbud Kongsan, ki ban pynmeh ia ki light kiba la pynpur kylleng ban wanrah jingshai hapoh ka Shnong ia kiba la shna bad pynwandur hala ki jong ki jingmut ha ki Iing ki sem, ki dieng, ki lynti syngkien bad ter ter.
Ia kine ki kor pynthaba yn pynmeh manla ka miet naduh ka por 5 baje janmiet haduh ka por shiteng synnia bad kan iai bteng haduh ka 3 tarik Kyllalyngkot.
Ban pynbyrngia ia ki Nongshongshnong, ka Dorbar Shnong kala pynbeit ruh ia ka Christmas Concert ha ka miet 22 tarik Nohprah ha kaba ka kynhun tem “Taken Aback” kaba na Mawngap, East Khasi Hills District bad ka “The LYNX” na West Jaintia Hills, Jowai, kin kiew halor ka rynsan ban pynbyrngia ia u paidbah.
Ha ka 23 tarik ruh la pynbeit ba kan don ka Music Night ka ban iashimbynta da u Eladmitre Dkhar bad DJ Wanshan.
Ka Dorbar Shnong ka pyntip ba la pynbeit ia ka jaka sah miet ia ki briew kiba wan ha Tista Guest House, East Side Inn, Mon Maya Guest House bad Wika Guest House.
