Guwahati, Nailar 03 : Ki bor pulit ka Assam ki la ioh ban kem sa ia arngut ki suba lehnoh ki ba don jingiadei bad ka tnat treikam jong ka Al-Qaeda ka ba dei napoh Bangladesh na Barpeta district ka Assam.
Katkum ki pulit, uwei na kine ki suba u la shah kem noh ha kane ka miet sngi U Blei ba la lah na Garemari Pathar bad uwei pat u la shah kem na kawei ka shnong ka ba hap hapoh Kalgachia hynnin ka step sngi ba Ar.
Utei u suba u ba la shah kem ha ka miet sngi U Blei u la don hapoh ka jingtohkit jong ki pulit na ka bynta phra sngi kynthih. Katba ia utei uwei pat yn wanlam hakhmat ka kashari hapoh kine ki 24 kynta ki ban wan,” ong u heh pulit.
Na ka liang u Special Director General of Police (Law and Order) ka Assam, u Gyanendra Pratap Singh ha ka sngi Nyngkong ba la lah u la ong ba haduh 11 ngut ki briew ki la shah kem noh na Morigaon, Goalpara, Guwahati bad Barpeta halor ka jingshah kynnoh donkti bad ka kynhun seng lehnoh Ansarul Bangla Team (ABT) ka ba napoh Bangladesh, bad mynta ki dang don hapdeng ka jingshah tohkit ha ki pulit.
Ha kawei pat ka bynta, ka kynhun na ka tnat National Investigation Agency (NIA) ka la wan poi ha Barpeta hynnin ka sngi ba Ar na ka bynta ban pynlong ka jingtohkit ia baroh ki ba la shah kynnoh ba ki dei ki dkhot jong ka kynhun ABT ki ba la shah kem naduh kine ki san sngi ba la dep, ong ka khubor heh pulit.
Ka tyllong khubor pulit ka la pynthikna ba baroh kine ki suba lehnoh ki la don hapdeng ka jingshah tohkit ha ka kynhun ka NIA nalor ki heh na ka tnat Special Branch jong ki pulit ka Assam ha Barpeta.
Na ka liang u Singh u la kam ba lyngba ka jingtohkit la pynthikna halor ka jingiadon bynta jong kine ki 11 ngut ki briew ki ba la shah kem bad ka kynhun ABT.
Ha Marigaon, uwei u briew ia u ba la tip kyrteng kum u Mufti Mustafa u ba khmih ia kawei ka skul ba la tip kum ka Jamiul Huda Madrasa ha ka shnong Soruchola ka ba hap hapoh Moirabari Police Station u dei u ba nyngkong eh u ban shah kem ha ka miet jong ka 26 bad 27 tarik u Naitung ba la dep. Katba ia u trai jong kawei ka dukan die computer ia u ba la tip kum u Afsaruddin Bhuyan la kem noh ha ka sngi ka ba bud.
