Shillong, K’Lyngkot 14: U Myntri ka tnat ka koit ka khiah Bah Wailadmiki Shylla u la pynthikna ba ia ka tulop ba dang sahteng jong ki 288 ngut ki Nurse ba trei kam Contract, yn sa pyllait noh hapoh une u bnai.
“Kam dei ba ngi ap ia ki sengbhalang ne ki seng sain pyrthei ban dawa, ngi la don lypa ha ka jingpynkhreh ban pyllait ia ka tulop ba dang sahteng” ong u Bah Wailad.
U Bah Wailad u la batai ba ka jingslem ban siew tulop ka dei namar ki jingeh kiba mih ha ka liang ka tnat Personal kaba la mynjur ban pynjlan ia ka kam contract tang na ka bynta ki 200 ngut ki Nurse, ha ka jaka jong baroh 288 ngut.
“Ngi la phah biang ban pynbeit namar ba ngi kwah ba baroh 288 ngut ki Nurse ki dei ban ioh jingmynjur. Dei na kata ka daw ba ka la shim por ban siew iaka tulop jong ki” u la ong.
Ka samoi (Contract) treikam jong ki Nurse ka la kut noh ha ka 1 tarik Naiwieng 2025, bad naduh katei ka por ka tnat ka la pynbeit ia ki jingeh khamtam ban pynjlan biang iaka samoi treikam jong ki Nurse bad kala rai ruh ban pyllait noh ia ka tulop kaba dang sahteng hapoh u bnai Kyllalyngkot 2026.
“Ha une u bnai hi kin sa ioh ia ka tulop jong ki” la pynthikna u Myntri.
