Shillong, K’Lyngkot 07: U Chief Secretary ka Jylla bah DP Wahlang hynne ka sngi u la pyntip ba un leit ban iakynduh ia u Secretary bad Additional Secretary in-charge Higher Education, ka Sorkar India ha ka 13 tarik mynta u bnai ban iakren ia ka jingeh ba iadei bad ka skulbah North Eastern Hill University (NEHU).
Haba kren shaki lad pathai khubor u Bah DP Wahlang u la ong, “Nga iakren bad u Secretary ka Sorkar India bad kumjuh ia u Additional Secretary. Ha ka jingshisha, ngan sa iakynduh ia u Secretary ha ka sngi Nyngkong (13 tarik Kyllalyngkot) ban pyntip ia kaei kaba la jia namar u dang shu shimti kum u Secretary ka tnat pule puthi. Ngan sa iakynduh ia u bad ai jingmut ruh ia u ia kaei kaba donkam ban leh na ka bynta ka NEHU”.
Ka Tnad Ministry of Education ka Sorkar India ka la thaw ïa ka Committee kaba don arngut ki dkhot ban tohkit halor ka jingkynnoh ba don ki jingleh bymsuidniew bad ki jingthut ha ka rukom pyniaid iaka NEHU, kaba la pynlong ïa ki jingïakhih ba la ïalam da ka NEHUSU bad ka KSU ban dawa ban weng noh mardor ïa u vice chancellor ba mynta u Prof PS Shukla.
Haba kylli, u CS u la ong “Haba iadei bad ka jinglong jingman ka kamram jong ngi ka long ban pynthikna ba kan num mih kano kano ka jingkulmar hapoh ka skulbah. Kadei ka skulbah pdeng, ngi hap ban husiar bha, kam dei ka skulbah Sorkar Jylla, ngim lah ban shim kano kano ka rai na ka bynta ka NEHU”.
U la pyntip baka Committee kala dep pynbiang iaka kaiphod bad kala dep aiti shaka Ministry.
“Ïa ka kaiphod la pule bniah da ka tnad ruh hynrei kaei ka rai kaba ki la shim kaba ym shym la pynsngew sha ngi,” u la bynrap.
Nalor kane u CS u la ong “Ngi don katto katne ki mat ba kyrpang ban iakren bad ngi kyrmen ba kine ki mat kin wanrah ia ki lad ki lynti ban weng ia ka jingeh hapoh ka skulbah NEHU.”
“Namar ba kam dei ka skulbah jong ka Jylla, ngi peit bniah halor ka jinglong jingman. Ngim kwah ba ki samla pule kin mad jingeh namar kano kano ka jingeh jong ka ain ne jingeh kumta kumta ngi tuklar hynrei ki kam hapoh jong ka NEHU kim long kumta ha ka kti jong ka Sorkar Jylla ne ka tnad pule puthi jong ka Jylla” u la ong.
