Shillong, Iaiong 03 : Uwei u briew ula mynsaw na ka jingshei kuli hadien ka jingioh khem bakla uwei u CRPF ia ka suloi AK katba u dang pyrshang ban pynieng ia ka kali kaba pyrshang ban tynrah ia ka kynhun iaid pahara ha Mendipathar, North Garo Hills.
Kane ka jingjia kala jia ha ka miet sngi Balang.
Katba ka kynhun iaid pahara ka Mendipathar Police Station bad CRPF ki dang iaid pahara hajan ka Pushpa Cloth Store, ha Iew Mendipathar, kynsan kynsan la wan kawei ka kali AN01-AM-7750 kaba la pynher sted bha bad pyrshang ban tynrah ia ki CRPF kiba dang shong ha shuki ka Pushka Cloth Store.
Haba iohi ia ka jingma, ki CRPF kila mareh na katei ka jaka ban iada iala ka jingim bad kila leit tur sha ka kali hynrei u nongniah ula pyniaid biang shakhmat ia ka kali haba pyrshang ban tynrah bad phet krad syndon ialade, ong ki Pulit.
Ha kane ka jingjia, haba iohi ia ka jingma bad ka jingthmu thombor ki runar, kane ka kynhun pahara kala pyrshang ban pynsangeh ia ka kali bad ha ka jingiada ialade, uwei u CRPF ula pynap da ka AK bad pyrshang ban plie ia ka jingkhang kali hynrei katba u dang plie ia ka jingkhang, u nongniah ula pyrshang phet biang kaba ha ka jingiaid kynsan ka kali, une u CRPF ula kum siat bad dei ia uwei pat uba shong hapoh ka kali bala tip kyrteng u Neobirth R Marak (28) ba na ka shnong Thapa Darenchi.

Une u kuli ula leit shei na ki bynta jong ka lbong jong une u briew bad la pynkit noh mar mar ia u sha Mendipathar PHC ban ioh jingsumar.
Ki Pulit kila kem ruh ia u nongniah ka kali ba kyrteng u Sengrim K Sangma ba na ka shnong Thapa Darenchi.
Kat kum ka kaiphod ki doktor, la pynthikna ba kine baroh arngut kila shoh khawiang bha. Ha ka jingtalasi ia ka kali, ki Pulit kila ioh kurup bun bah ki bitor kyiad.