Nongpoh, Naiwieng 12 : Uwei u nongniah trok ba kit clinker, ula mynsaw jur na ka jingleit tynrah ia kawei pat ka trok kaba ieng harud surok hynne ka step phyrngap ha ka thain 12 mer, Ri-Bhoi District.
Une u nongniah trok ula sahkut haduh arkynta eiei hapoh ka kali namar ka jingjam palat ka jingleit tynrah haduh u pud ba poi sha ka jingkdiah ki kjat.
Une u nongniah trok uba mynsaw la tip kyrteng da u Hanpaia Laloo, na ka shnong Rakabab West Jaiñtia Hills District.
Kat kum ka khubor Pulit, kane ka jingjia kala wan jia namar ka jingpynher sted palat jong kane ka trok kit clinker ba don u nombor ML11-A-1436, kaba poi sha ka jingleit tynrah ia ka trok ba ieng harud surok kaba don u nombor NL01-AD-5135.
Ki Pulit ka Byrnihat Police Outpost ha ryngkat ki Pulit Fire & Emergency Service, kila hiar mar mar sha katei ka jaka ban iarap sei ia une u nongniah trok uba la sahkut ha kali. Ki Pulit kila pyndonkam da ki 3 tylli ki kali khwai ban lah sei ia une u nongniah, kaba la shimpor haduh 2 kynta eiei.
Ia une u nongniah trok la pynkit noh sha GMHC ha Guwahati.
