Shillong, April 15: Ki jaka pule ka East Khasi Hills district kila mynjur ban nang pynbun ia ka jingpynrung klas ia ki khynnah pule ban ai jaka ia khambun ki khynnah kiban pule klas XI.
Ia kane ka rai la shim ha ka jingialang kaba la lum da ki bor pyniaid district ka East Khasi Hills bad ki khlieh jong ki jaka pule kiba don ia ka 10+2 ne HSSLC ha ka 15 tarik u Iaiong, da kaba kyntu ruh ia ki, ban kin pynbun ia ka jingpynrung klas ia ki khynnah ha ki jaka pule ki jongki khlem da ktah pat ia ka rukom ai jinghikai kaba paka.
“Ha kaba iadei bad kane ka bynta, ki khlieh jong ki jaka pule kila pynthymmai ia ka jinglah ban pdiang klas shuh shuh ia ki khynnah bad ia kane la buh ha ka website jong ka district (https://eastkhasihills.gov.in),” la pynpaw ka Deputy Commissioner ka East Khasi Hills ha ka kyrwoh hynne ka sngi Baar.
Kumba ka long, ka jinglah ban pdiang ia ki khynnah pule ha ka HSSLC ha ka jylla ka long 51,000 ngut. Hynrei mynta u snem, ka jingpass ki khynnah pule ha ka SSLC ka long 55,475 ngut.
