Shillong, Jymmang 30: Ka Voice of the People Party (VPP) kala pynbna ba kan leit iashimbynta ha ka jingialang jong ka Committee ki seng sain pyrthei- ka ban iakren halor ka Reservation Roster bad ka Reservation Policy hynrei kala rai pat ba ka jingshah jingit jong u President bad MLA ka Nongkrem Bah Ardent M. Basaiawmoit kan iai bteng beit katba ka Sorkar kam pat pynbeit thymmai ia ka Policy.
Ia kane la pynbna da u Bah Ardent M Basaiawmoit haba kyntu ia ki paidbah ba kim dei ban thaw ia kino kino ki jingkulmar haba ong “Lada huri hura, ka ban iohnong kan dei ka Sorkar”.
Lah ban kdew hangne ba ka Sorkar Jylla hynne ka sngi kala pynmih ia ka jingpynbna ba kala thaw thymmai ia ka Committee ki Seng Sain Pyrthei ka ban iakren halor ka Roster System bad ka Reservation Policy. Kala kynthup lang ia ka kyrteng u Bah Ardent kum u Dkhot ha ka Committee haba ailad ruh ban pynrung sa arngut ki Dkhot ba kin wan iashimbynta lang ha ka jingialang.
Kane ka Committee kan shong jingialang lashai ka sngi ka 31 tarik u Jymmang ha ka por 2:30 baje nohphai sngi ha Conference Hall ka Secretariat, Shillong.
U Bah Ardent u dei uwei na ki Dkhot jong ka Committee ki seng sain pyrthei bala thaw thymmai da ka Sorkar Jylla hynne ka sngi Ba-ar, kaban iakren halor ka jingpyntreikam ia ka Roster System bad ban iatai ia ki kam ba iadei bad ka Reservation Policy.
“Ngan leit sha ka jingialang hynrei ngan ym pat pynsangeh ia ka jingshah thngan. Ngin ap ia ka rai ka ban mih na kane ka jingialang bad lad aka jingiakren kam seisoh, ngin pynbteng ia ka jingiakhih” ula ong.
Ha kajuh ka por, une u Nongialam ka VPP ula ong ba ka por kala dei ban pynkut noh ia ka jingmutdur ba kam ju don ka jingiatylli hapdeng u Khasi namar la iohi ba ki paidbah na kylleng ki jaka kila iamih ban wan ai jingkyrshan ia ka jingiakhih ba dawa pynkylla ia ka Reservation Policy ka Jylla.
Katba u MLA ka VPP na Mawlai Bah Brightstar Marbaniang ula pynbna ba ka jingkhot iakren ka Sorkar halor ka Reservation Policy, ka dei ka jingjop ia u paidbah ka Bri u Hynniewtrep.
