Sdang ka Jylla ban pyntreikam ia ki Ain bymman ba thymmai
Shillong, Jylliew 19 : Ka Sorkar Jylla ha ka sngi Balang, kala mynjur ia ka kyndon ban pynlong kongsan ia ka jingtohkit Forensic ha ki jaka ba jia kam bymman (Forensic Crime Scene Investigation) kumba la pruid dak da ka Bharatiya Nagarik Suraksha Sanhita, 2023 (BNSS), kaba bujli ia ka Criminal Procedure Code, 1973 (CrPC).
Haba iakren sha ki lad pathai khubor hadien ka jingialang Kynhun Myntri, u Myntri ka Tnad Social Welfare Bah Paul Lyngdoh ula ong ba ka Sorkar India kala pynmih ia ka jingpynbna paidbah ba ka BNSS, 2023 kan treikam noh bad kan bujli ia ka CrPC hapoh ka 1 tarik Naitung, 2024.
“Kumta ka jingdonkam ban bujli ia ka jingpyntreikam ka BNSS bad naba kine ki ain kam bymman kin sa treikam noh naduh ka 1 tarik Kyllalyngkot, ka Sorkar Jylla ka dei ban pynmih jingpynbna ia ka jingtreikam ka BNSS, 2023” ong u Bah Paul.
U Myntri ula pyntip ruh ba ka kynhun Myntri kala ai jingmynjur ruh ban pynlong kongsan ia ka jingtohkit Forensic ha ki jaka ba jia kam bymman.
“Da ka jingpyntreikam ia ka BNSS, 2023, ka la long kongsan ia ka Jylla ban pynthikna ba ki stad forensic ki dei ban leit sha ki jaka ba jia kam bymman. Ki don bun jait ki kam bymman, kiba ishyrkhei ha kaba ka jingpynsajia ka long 7 snem ka jing set along bad palat” ula ong.
Ula bynrap ba hapoh kane ka jingtyrwa ba thymmai bala aiti da ka Directorate of Forensic Science, kin don ki kali ki ban shakri ia ka kynhun ki stad tohkit forensic, ki ban don ha baroh ki District Headquarter.
Ha kawei ka liang, u Secretayr ka Tnad kam Pohiing Bah Cyril Diengdoh ula ong ba ka Sorkar Jylla ka dang pynkhreh mynta ban pynkha ia ki kam ha kaban pynbun ia ka jingdon ki stad forensic hapoh ka Jylla.
Haba kylli, u Bah Diengdoh ula ong ba ka BNSS kan ym don jingktah satia ia ki Iingkashari kiba hap hapoh ki District Council.
Ula ong ba ka BNSS ka dei ia baroh ki kashari naduh ki District & Session Judge, Judicial Magistrate CGM hynrei u ong “Ngan pynshai ba ka BNSS kan ym treikam ia ki Iingkashari jong ki District Council”.
