Shillong, Iaiong 1: Ka Sorkar Meghalaya kala mynjur ban pyntreikam ia ka Provident Fund Scheme kaba la sahteng la slem na ka bynta ki nongtrei ha ki bym dei ki skul bad college Sorkar kiba ioh pdiang ia ka Deficit Grants na ka jylla.
Haba pyntip ia kane hadien ba la lum ia ka jingialang jong ka Kynhun Myntri, u Myntri Rangbah u Conrad K Sangma ula ong, “(Ngi lah ai ka jingmynjur) ban pyntreikam ia ka Meghalaya Non-Government Schools and College Employees Centralized Provident Funds Scheme 2026”.
“Kumba phi tip, ki don bun ngut ki nongtrei ki bym dei ki skul sorkar bad college bad da kaba pynshong nongrim katkum ka Ain, kala don ka jingnoh synniang kaba katto katne hynrei ka sorkar kam shim la don satia ia ka scheme kaba biang ban pyntreikam ia kane ka jingnoh synniang. Mynta ka sngi, ka kynhun myntri ka lah mynjur ia katei ka scheme bad shisien ba kane kala ioh ia ka jingmynjur bad katkum kane ka scheme hi, ki nongtrei ki bym dei jong ka skul ne college sorkar kin ioh ia ki jingmyntoi na ka Provident Fund”.
Ula ong, ba kane kan treikam na ka bynta ki nonghikai Deficit, ki nongtrei ha ki skul bad college shimet kaba la bei tyngka lyngba ka jingkyrshan ka sorkar kum ka St Anthony’s College, St Edmund’s College, Shillong College bad kiwei kiwei.
“Kine ki college kiba lah don kadei kaba ka sorkar kala ai ia ka tulop ha ka dur jong ka deficit grant,” ong u Sangma.
Ki jingnoh synniang na kine ki nongtrei kadei kaba la khate na ka Ain kaba la shim pateng na ka Assam bad pdiang lang da ka Meghalaya, hynrei kam shim la don pat kano kano ka scheme ban pyniaid ia kane ka pisa sha ki ynda kila shongthiat na ka kam.
“Ka sorkar ha katei ka por kam shim la pynmih ia ka scheme kumno ban pyniaid ia ka jingnoh synniang ia kaba yn ai biang sha ki nongtrei jong ki college bad skul haba kila shongthait noh. Kumta mynta ka sngi kaei kaba ngi lah leh kadei ba ngi lah mynjur ia kaei kaei kaba la sahteng la slem bha bad kata kadei kaei kaba ngi lah leh” ula bynrap.
U Myntri Rangbah ula ong, ba ym don ha kti ia ki jingtip kiba bniah halor ka jingdon jong kine kiba ioh jingmyntoi hynrei kane ka scheme mynta kan pynbiang ia ka rukom treikam ha kaban sam ia kine ki jinglum ia ka jingnoh synniang.
Haba kylli halor ka jinglut jingsep, u Myntri Rangbah ula pynshai da kaba ong, “Em, ka jingnoh synniang kadei kaba lah dep ban leh lypa, kumta kadei tang ka jingkylli ba ia mynta yn sam sha ki baroh bad kadei ban don ka rukom treikam bad ka scheme kaban iaid bad kaban sam”.
