Shillong, K’lyngkot 11 : Ka Kynhun Myntri jong ka Sorkar Meghalaya Democratic Alliance (MDA) hynne ka sngi Balang, kala ai jingmynjur ia ka Meghalaya State Organic Farming Policy.
Cabinet has approved the Meghalaya State Organic & Farming Policy 2023 to further our efforts towards Organic Farming in Meghalaya. The Policy will streamline our plan of action and will look into aspects of organic certification of produce.@nstomar @AgriGoI pic.twitter.com/rrle9P7HkJ
— Conrad Sangma (@SangmaConrad) January 11, 2023
Haba iakren bad ki lad pathai khubor hadien ka jingialang, u Myntri Rangbah Conrad K Sangma ula ong ba kane ka Policy kan ai ka jingbatai kaba shai ba kumno yn pyniaid shakhmat ia ka Organic Mission bad haba iadei bad ka jingrep mar rep khlem khleh dawai (organic farming) hapoh ka Jylla.
U Conrad ula ong ba kane ka Policy kan pynthikna ruh ba ki paid nongrep kin ym donkam shuh ban hap leit sha jngai tang ban ioh ia ki syrnot ba pynshisha ba ki dei ki marrep ba khlem khleh dawai.
“Ka Bio Resources Development Centre ka dei kaba la dep iateh ban ai ia ka organic certification (syrnot) bad yn sa kynthup lang ruh ia kiba bun ki Tnad treikam jong ka Jylla” ula ong.
Kat kum ka jingong jong u, ka Policy kan pynthikna ruh ia ka jingpynkha ia ki dukam bad ki jaka die kiba ki briew ki lah ban leit ha kaban thied ia ki jingbam ba khlem khleh dawai.
Haba kylli halor ka rai jong ka Sorkar ban weng noh ia ka jingkhang pyndonkam ia ki sboh dawai bad ka jingthmu ban lah pynseisoh ia ka mission organic, u Myntri Rangbah ula ong ba ka long kaba donkam ban pynbiang tarajur ia kiei kiei baroh namar kam long kaba suk ban ong “mynta ngin pyndonkam ia ka sboh bad lashai pat ngi shu pynsangeh noh bad ngi la pynkylla ia ka jingrep sha ka organic farming shisien leh”.
Ula ong ba kane ka Policy kan pynthikna ia ka jingpynkylla ia ka rukom rep na ka rep sboh sha ka rep khlem dawai ha ka lynti kaba suk jai pa jai.
