Pynbna ai subsidy ia ki nongshna phlim tynrai lajong | Grant ia kiba shna TV serial bad web series
Shillong, Naitung 10 : Ka Sorkar Jylla kala shim ia ka sienjam kaba kongsan ban kyntiew ia ka karkhana shna phlim ha Jylla da ka jingai jingmynjur ia ka Meghalaya Film Tourism Policy 2025.
Kat kum ka jingong u Myntri kam jngohkai Bah Paul Lyngdoh, kane ka policy ka thmu ban pynlong ia ka Meghalaya kum ka jaka pdeng ban shna ia ki phlim hapoh ka thain Shatei Lam Mihngi bad ban tei ia ki jingtei kiba donkam ha kylleng ka Jylla.
Haba iakren bad ki nongthoh khubor hadien ka jingialang jong ka Kynhun Myntri, u Bah Paul ula ong ba ia ka Draft Meghalaya Film Tourism Policy 2025 la pyllait lai bnai mynshuwa da u Myntri Rangbah ka Jylla Conrad K Sangma lem bad u ha kaba ka Sorkar kala pan ia ki jingai jingmut na baroh ki kynhun kiba don bynta ha kane ka kam.
U pyntip ba palat 200 tylli ki jingai jingmut na ki kynhun bapher bapher ba kynthup na ki nongshna bad nongpynmih phlim ka Jylla la ioh ban pdiang bad la pynrung lang hapoh ka policy.
“Mynta ka sngi ngi la wanrah ia ka policy hapoh ka jingialang ka Kynhun Myntri Kala don ka jingiakren kaba sani bha bad hadien ka Kynhun Myntri kala ai jingmynjur ia ka Policy. Kane ka dei ka sienjam kaba khraw ban pynthikna ba ngin plie ia ka Meghalaya ha ka rukom kaba heh bha lyngba ka film tourism ne ka jingwan shna phlim ha Jylla” ula ong.
U Bah Paul ula iathuh ba ka Meghalaya Film Tourism Policy ka kwah ban pynleit jingmut halor ka jingshisha ba ka Meghalaya ka don ia bun bah kiei kiei kiba lah ban khring ia ki nongshna phlim na kylleng ki ri ka pyrthei.
“Ngi kwah ban pynshlur ia ka jingpynmih phlim ha ka kyrdan National bad International bad ruh ban pynlong ia ka Meghalaya kum ka jaka ban shna phlim ha ka thain Shatei Lam Mihngi bad ruh ban tei ia ki jingtei kiba donkam ha kylleng ka Jylla” ula ong.
U pyntip baka Sorkar kan sa thaw ia ka “Film Facilitation Cell” ka ban wanrah ia ka jingiatreilang hapdeng ki Tnad ka Sorkar, kynthup a Tnad Jngohkai, Arts & Culture bad DIPR ban rah ia ka nam jong ka Meghalaya kum ka jaka kaba biang eh ban shna phlim la ki dei ki Regional, National ne wat ki International”.
U Myntri ula pynbna ruh ia ka jingkyrshan da kaba ai subsidy ba kot haduh T.1 klur lane 25% na ka jingpynlut ia ka phlim sha kito ki phlim kiba pyndonkam da ki ktien ba kren bun paid eh hapoh ka Ri bad kumjuh ruh jong ki ri ka pyrthei, kaba ka jingring ia ki phlim ka dei ban long 75% na ki sngi ring phlim ha Meghalaya.
Haba pynbna ruh ia ka jingkyrshan ia ki Cinema ba don ha Jylla, u Bah Paul ula ong “Nga sngewkmen ban pyntip sha phi ba ki nongpynmih phlim ha ka ktien Khasi, Pnar bad Garo kin ioh ia ka jingkyrshan subsidy ba T.50 lak ia kaba ki nongshna phlim ki lah ban ioh ia kane ka jingiarap shisien ha man ka arsnem”.
U bynrap ba kan don ruh ka jingkyrshan pisa ban shna bad pynmih ia ki TV serials bad ki show, web series bad ki original show ki ban pyni ha ki OTT platform-Hello Meghalaya App, kaba dei ka OTT platform bala bei tyngka da ka Sorkar hapoh ka Ri.
