Shillong, K’lyngkot 11 : Ka Kynhun Myntri jong ka Sorkar Meghalaya Democratic Alliance (MDA) hynne ka sngi Balang kala ai jingmynjur ia ka Meghalaya Advertisement Policy, 2023.
Hadien ka jingialang, u Myntri Rangbah ka Jylla Conrad K Sangma ula ong ba kane ka Policy kala mih hadien ka jingiasyllok bad ki kynhun bapher bapher.
U ong ba ia kane ka rai la shim namar ba ka jingbym don kane ka policy, kala don shibun ki jingbym shai haba phai sha ka jingai advertisement khamtam sah ki kot khubor bad lad pathai khubor bad ruh ka daw ba pynslem ban siew ia ka bill.
Haba batai ia ki mat jong kane ka policy, u Myntri ba khmih ia ka Tnad Information & Public Relation James K Sangma ula ong ba kane ka kam ka dei kaba la sah slem bha haba buh hakhmat ia ka jingbym long shai ha ka rukom treikam kaba donkam ban leh haba ai advertisement bad ruh ban siew ia ki bill.
“Namar kata, ngi sngew ba ka long kaba donkam ban pynbeit ryntih ia ka rukom treikam lyngba kane ka advertisement policy” ula ong haba bynrap “Nalor kane, ngi hap ban buh ruh ha ka jingmut jingpyrkhat ba ki advertisement bad ki rukom ai advertisement ha kine ki sngi kila iapher bha haba ianujor bad 10 snem mynshuwa. Haba khmih ia kine kiei kiei, ka jingwan jong ki kor ka juk, ka jingmih jong ki social, digital bad online media ruh ki dei kiba ngi hap ban shimkhia lang”.
Ula ong baka Directorate of Information and Public Relation (DIPR) nangne shakhmat kan dei ka nodal agency ka ban ai ia ki advertisement sorkar bad kiwei kiwei ki agency kiban pynmih ha ki kot khubor bad ki lad pathai khubor electornic.
