Shillong, K’lyngkot 10 : Ka Kynhun Myntri ka Sorkar Jylla ha ka sngi Thohdieng, kala ai jingmynjur ban pynkylla thymmai ia ki kyndon jong ka Meghalaya Factories Rules, 1980, kaba thmu ban pynjlan ia ka por ban pynthymmai ia ki Licence sha ka 10 snem.
Hadien ba dep pyniaid ia ka jingialang ha Sohra, u Myntri Rangbah Conrad K Sangma ula ong “Ia kane la leh kat kum ki kyndon bala buh da ka Sorkar India ban pynsuk ia ka jingsengkam sengjam, ha kaba katto katne ki licence kiba hap ban pynthymmai manla u snem, ka sorkar India kala tyrwa ba ia kine ki licence yn pynjlan noh sha ka 10 snem”.
“Hooid ki jingleit talasi bad jingpeitngor ba man ka por yn hap ban leh da ka Sorkar. Kumta, kat kum kine ki licence factory, ngi lah wanrah ia kine ki jingpynkylla kat kum ki jingai jingmut ka Sorkar India kaba long kat kum ki kyndon ban pynsuk ia ka jingsengkam sengjam” ula bynrap.
U Myntri Rangbah ula pyntip ruh ba la pynrung ruh ia ka kyndon ba thymmai kaba shah ia ki kynthei ba kin trei ha ka por mynmiet haba bud ia ki lad ki lynti jong ka jingshngain.
“Mynshuwa ym ju don ka jingai jingbit ia ki kynthei ba kin trei ha ka por mynmiet bad ka Sorkar India kat kum ka kyndon ba pynsuk ia ka treikam treijam, kala kyntu ia ki Jylla ba kin pynkylla ia ka ain bad hangne ha ka thain Shatei Lam Mihngi, ka Assam kala dep ban leh ia kane bad ngi dei ka Jylla kaba ar ban pyndep ia ka mynta ka sngi” ula ong.
