Shillong, Nohprah 9 : Ka Sorkar Meghalaya kala ai jingmynjur ban thungkam pura noh ia ka jingshakri ki palat 221 ngut ki nurse bad paramedic ba pass na ka jingiateh bond bad ka Sorkar hapdeng u snem 2008 bad 2012.
Haba pynbna ia ka rai hadien ba pyniaid ia ka jingialang ka Kynhun Myntri ha ka sngi Ba-ar, u Myntri Rangbah ka Jylla Conrad K Sangma ula ong “Hadien ka jingiakren kaba bniah bad ka Tnad ka Koit ka Khiah bad ki bonded nurse, ka Kynhun Myntri kala rai ban ithuh ia ka jingthungkam bala leh hapdeng kine ki snem. Ka jingthungkam la leh ha kitei ki snem bad la iaid kat kum ki kyndon bad kumta, ka kynhun Myntri kala rai ba ki 221 ngut ki bonded nurse bad bonded paramedic kiba la sha thungkam hapdeng u 2008-2012, ngi la rai ban pynskhem ia ka jingthungkam jong ki bad ai jingithuh ia ki”.
“Namar kata, ka jingthungkam ha kine ki post yn ym leh shuh namar ngi la dep mynjur bad ai jingithuh ia ka jingthungkam bala leh ha kitei ki snem kaba long thik tang iaki bonded nurse bad bonded paramedics” ula bynrap.
U Mynyri Rangbah ula ong ba ki nongtrei adhoc ki dei ki nongtrei kiba la thung pyrshah ia ki sanction post hynrei ia ka rukom thungkam ym shym la bud bad la shu thung ia ki kumto haba bynrap ba ka Sorkar kala dep shim ia ka rai ban pynbna paidbah ia ka jinglait ki kam bala thung ia ki nongtrei adhoc hadien u snem 2007 ban pynthikna ia ka jinglong khuid bad ba shai.
Hynrei, u Conrad ula pynpaw ba ia ka kam jong ki bonded nurse bad paramedic ka long kaba pher. “Haba ngi ngam jylliew ia ka rukom treikam, ngi shem ba ki bonded nurse, ki dei kiba la iasoi ia ka bond bad ka Sorkar ha ka por ba ki leit pule bad halor kane ba la thungkam iaki” ula ong.
