Shillong, Nailur 25 : Ka Kynhun Myntri ka Sorkar Jylla ha ka sngi Balang kala mynjur ia ka jingtyrwa ban thied jaka biang na ka bynta ban shna pynheh ia ki artylli ki kad liengsuin ha Jylla-ka Shillong Airport bad ka Baljek Airport.
Ka Sorkar Jylla kala rai ruh ban pan ia ki jingbit ba donkam na ka Directorate General of Civil Aviation (DGCA) hadien ka kaiphod sorjamin ba khatduh, kaba pyni ia ka jinglah ban pynheh ia ka Shillong Airport n aka bynta ban hiar ki liengsuin kiba heh.
Haba pyntip ia kane hadien ba wai ka jingialang Kynhun Myntri, u Myntri Rangbah ka Jylla Conrad K Sangma ula ong “Mynta ka sngi, ka kynhun Myntri kala ai jingmut ban pyniaid shakhmat bad sdang ia ki kam ban thied jaka na ka bynta ka Shillong Airport”.
Haba pan ia ka jingiatreilang jong baroh, u Conrad ula ong “Kaei kaab kongsan ka long ba kane ka project kan wanrah ia shibun ki jingkylla ia ka Jylla jong ngi. Nga sngew ba baroh kiba don bynta ha kane, ki dei ban sngew thuh katno ka jingkongsan kane ka project ia ka Meghalaya bad ia ki kam jngohkai bad kiei ki lad ki lynti b aka don ban wanrah ia ka jingkylla ia ka ioh ka kot bad ki kam jngohkai ha Jylla jong ngi. Kumta, kane ka dei ka kam kaba ngi hap ban iatreilang bad lah pynurlong”.
Haba pynpaw ba ka sienjam kaba bud ka long ban pan jingbit na ka DGCA, u Conrad ula ong “Hadien ka jing pule bniah ia ka kaiphod bala aiti da ka Tnad GTrasnport ha ryngkat ka AAI, ka sienjam ba bud ka long ban ia shong bad ka DGCA bad ban buh ia kane ka jingtyrwa hakhmat ka DGCA”.
“Nga kyrmen ba jingialang (bad DGCA) kan long kaba sngewtynnad namar ngi la trei shitom bha ia kane” ula ong.
Ha ka sngi Ba-ar, ka Airport Authority of India (AAI) kala pyntip hapoh ka Iingkashari Meghalaya High Court ba ka jingpynheh ia ka runway ka Shillong Airport kan long da 571 meter bad yn lah ban pyntrei ia kane ha ka jinglut ba T.100 klur da ka Sorkar Jylla lait noh kiwei kiwei ki jinglut ki ban bei da ka AAI, ka ban kot baroh haduh T.500 klur.
Haba kylli halor ka Baljek Airport, u Myntri Rangbah ula pyntip ba ka jingiakren ban thied jaka ban pynheh ia ka Baljek Airport ruh kala iaid shakhmat.
“Ka kam ban thied ia ka jaka kala iaid shakhmat, ka jingithuh ia ka jaka da ka tnad Revenue ka Ophis u DC ruh kala iaid shaid shaid. Kila dep ai ia ka kaiphod ba nyngkong hynrei ka AAI kam shym la hun satia ia kane ka kaiphod, kumta ka jingpynkhreh ia ka kaiphod ba bniah kala iaid mynta ha ryngkat bad ka kam jong ka Shillong Airport”.
