Shillong, Nailur 11 : Ka jylla Meghalaya ka la pynkhreh ban pynmih khajna shuh shuh sa T.90 klur hadien ba ka sorkar ka la mynjur ïa ka Meghalaya Excise Amendment Rules 2025.
Ki jingpynkylla ki kynthup ia ka jingpynkylla kyrdan biang ia ki jait jingdih IMFL, ka jingpynrung kyrdan ia ki jait jingdih ba dih paidbah, ka jingpynkylla ia ka khajna ia ki beer, bad ka jingpynkylla ia ki katto katne ki kyndon.
Haba kren sha ki lad pathai khubor hadien ka jingialang jong ka kynhun Myntri ha ka sngi Balang, u Myntri Rangbah ka jylla Conrad K Sangma u la ong ba ia ki jait kyiad IMFL (Indian Made Foreign Liquor) yn sa pynkylla kyrdan biang ban pynthikna ia ka dor kaba kham biang.
Yn pynmih ia ka kyrdan thymmai jong ka brand ba iadih paidbah ban ai kham bun ki lad ban jied ia ki nongthied.
Ia ka khajna jong ki beer ruh yn sa pynkylla ban pynlong ia ka dor jong ki beer kaba kham biang.
Katto katne ki rules, kynthup ka Rule 44(12), Rule 37(2)(1)(B), Rule 71(a), Rule 273, bad Rule 274, yn sa pynkylla noh.
“Kumta, kane ka dei ka sienjam ban pynthikna ba ka jingbuh dor jong ngi kan long kaba biang bad ngi khmih lynti ba ryngkat bad kata ngin iohi ia ka jingnang kiew ha ka jingdih kaba ngi khmih lynti ba kan pynkiew ia ka khajna, kaba ngi la antad ba kan long T.90 klur,” ong u Conrad.
