Shillong, Naitung 20 : Ka Sorkar Jylla lyngba ka Kynhun Myntri, ha ka sngi Palei, kala ai jingmynjur ia ka jingtyrwa ban mynjur noh da ka Ordinance ban pynduh noh ia ka Ranjeet Lal University Act, 2011.
Haba iakren bad ki nongthoh khubor hadien ka jingialang, u Myntri Rangbah Conrad K Sangma ula ong ba ka Ranjeet Lal University Act ka dei kaba la mynjur da ka Iingdorbar Thaw Ain ka Jylla ha u snem 2011 hynrei na ki daw kiba bun, kat haduh u 2020, u Lat ka Jylla um pat ai jingmynjur satia ia kane ka Ain.
Ha u snem 2020, ka jingmynjur jong u Lat kala wan ha u bnai Rymphang.
“Hynrei, naduh u Rymphang 2020 haduh mynta, ngim shym la iohi satia ia kano kano ka sienjam bala shim da kane ka University” ong u Conrad.
Ula bynrap “Ka Private University Commission kaba ngi don bad kaba teh kyndon ia ki University shimet, kala thoh shithi la bunsien sha kane ka University ba pan jingtip ia ka jinglong jingman ka kam ba ki trei hynrei kam shym la ai satia ka jubab kaba hun bad kumta hadien ba bud ia ki kyndon treikam bapher bapher, ka Kynhun Myntri kala mynjur ia ka jingtyrwa ban mynjur noh da ka Ordinance ban pynduh noh ia ka Act, 2011”.
Pule ruh: Rai ka Sorkar ban pynkiew ia ka dor ka diesel bad petrol da 50 naia
