Shillong, Nailur 20 : Ka Iingdorbar Lok Sabha ha ka sngi Balang, kala ai jingmynjur ia ka Women’s Reservation Bill.
Haduh 454 ngut ki MP kila kyrshan ia kane ka Bill katba arngut ki MP kila pyrshah ia ka.
Kane ka Bill ka pynthikna ia ka jingbuh bha ba 33 % ia ki Kynthei ban long ki Dkhot ha Lok Sabha bad ha ki Iingdorbar Thaw Ain ka Jylla.
Ka Sorkar National Democratic Alliance (NDA) ba ialam da ka BJP kala jer kyrteng ia kane ka Women’s Reservation Bill kum ka ‘Nari Shakti Vandan Bill’.
Haba kren hapoh Parliament ha ka sngi Ba-ar, u Myntri Rangbah Duh ka Ri Narendra Modi ula niew ia kane ka sngi kum ka sngi sah kynmaw bad kyntu ia ka Liang Pyrshah ban iamynjur lang ia kane ka Bill. Namar ka jingbym lah ka Lok Sabha ban mynjur ia kane ka Bill la jan 30 snem, u Modi ula ong “Ka jingpynkupbor ia ki Kynthei lyngba ka jingmynjur ia kane ka Bill kan nang pynkhlain shuh shuh ia ka jingsynshar paidbah haka Ri”.
Kane ka Bill, kaba dei ka Constitution (One Hundred and Twenty Eighth Amendment) Bill, 2023, ka kwah ban wanrah ia lai tylli ki article ba thymmai bad kawei ka clause ba thymmai ha ka Riti Synshar ka Ri. Kane ka clause ka dei ka 239 AA bad ki lai tylli ki Article ki dei ka 330A, 332A bad 334 A.
Kine ki Amendment kin pynthikna ba ki Kynthei kin ioh ia ka bhah ba 33 % ha Lok Sabha bad ki Iingdorbar Thaw Ain ha ka General category bad kumjuh ruh ha ka SC bad ST Quota.
