Shillong, Risaw 22 : Ka Khasi Hills Autonomous District Council (KHADC) ha ka sngi Balang, kala mynjur ia ka resolution ba dawa ia ka Sorkar Pdeng ban pyllait noh ia ki jaka riewlum na ka jingtrei kam ka Office Memorandum (OM) ka Ministry of Environment, Forest bad Climate Change (MoEFCC), ba ong ba ym donkam shuh ban iasyllok paidbah ne bishar paidbah ia ki project tih mar poh khyndew ba iadei bad ki otomic minearal kum u Uranium.
Haba wanrah ia ka resolution, u CEM ka KHADC Bah Winston Tony Lyngdoh ula ong, “Namar kata, kane ka Iingdorbar ka rai ban dawa ia ka Ministry of Environment, Forest and Climate Change bad ia ka Sorkar India ba kan pyllait noh ia ka jingtreikam jong ka Office Memorandum ba 8 tarik Nailur 2025, hapoh ki jaka riewlum jong ka Khasi Hills District”.
U iathuh ba ka MoEFCC kala pynmih ia ka OM ba ong ba baroh ki project tih ia ki otomic mineral bala pynbna ha ka Part B bad ki marpoh khyndew ba donkam hapoh ka Part D jong ka First Schedule of Mines and Minerals (Development and Regulation) Amendment Act, 2023, kin lait noh na ka jingiasyllok paidbah hapoh ka sub clause (f) jong ka clause 7(III) (i) jong ka EIA Notification ba 14/8/2006, khnang ban lah pyntrei kam ia ki project tih mawpoh khyndew ba iadei bad ki Atomic minerals.
“Hynrei, ia kane ka Memorandum la shim kum ka jingkyntur ia ka riti ka dustur bala rim bah jong ki jaidbynriew trai ri trai muluk bad la shim ruh kum ka jingkyntur sha ki jaka ki longshuwa manshuwa jong ngi bad ban tih ia ka khyndew ka shyiap bad ki jingdon jingem ha ka mariang khlem ka jingbit jong ngi, kaban buh ha ka jingma ia ka koit ka khiah ki briew jong ngi bad ka jingjot ka mariang” ula bynrap.
U CEM ula ong ba ka OM kan pynduh ia ki trai ri trai muluk ia ka hok ban pynpaw ia ka jingpyrshah. Ula pynksan ruh ba kane kam lam sha ka jingknieh jubor ia ki jaka pule bad ka jingpynjot pynjulor ia ka mariang.
U Bah Winston ula pyntip ba ka KHADC kala dep ban ai jingthoh sha u Secretary ka Ministry, ba dawa ban pyllait noh ia ki jaka ba hap hapoh u pud ka District Council na ka jingpyntreikam ia ka OM.
Haba kyrshan ia ka resolution, u Nongialam ka Liang Pyrshah Bah Titosstarwell Chyne ula onng baka Office Memorandum bala pynmih da ka Sorkar Pdeng ka dei ka ban ktah jur bha lashai lashisngi ia ka Jylla, ka ban set ia ka shyntur bad ka sur jong ki trai ri trai muluk da kaba pynduh noh ia ka jingbishar paidbah.
U Bah Titos ula ban jur ba ki paidbah ka Jylla kynthup ka KHADC, kila pyrshah khlem sangeh ia ka jingtih uranium. Ula kdew ba ka Sorkar Pdeng kala iai pyrshang ban tih ia u uranium ha ka Jylla hynrei kala iatakhuh bad ka jingpyrshah kaba jur na ki paidbah.
U Bah Titos ula ai jingmut ia ka Executive Committee (EC) ba ka dei ban dawa ban weng noh ia ka OM, ha ka jaka ban shu phah pyllait ia ki jaka kiba hap hapoh u pud u sam jong ka KHADC.
Ula kdew ba lada ka EC ka dawa ban shu pyllait, kan mut pat ba ia ka jingtih uranium la shah ha kiwei pat ki jaka kum ha ri-lum Jaintia bad ri-lum Garo.
“Ka Office Memorandum kan ktah ia baroh kawei ka Jylla, kumta ban ong ban shu pyllait ia ka Khasi Hills, ka resolution kan ym long kaba khlain haduh katta katta. Namar kata, nga ai jingmut ba ngi dei ban dawa ban weng noh syndon ia ka OM” ong u Bah Titos.
 ha ka sngi Balang, kala mynjur ia ka resolution ba dawa ia ka Sorkar Pdeng ban pyllait noh ia ki jaka riewlum na ka jingtrei kam ka Office Memorandum (OM) ka Ministry of Environment, Forest bad Climate Change (MoEFCC), ba ong ba ym donkam shuh ban iasyllok paidbah ne bishar paidbah ia ki project tih mar poh khyndew ba iadei bad ki otomic minearal kum u Uranium.){kind=link}