Shillong, Naiwieng 15 : Ka India bad ka Bangladesh kila mynjur ban plie biang noh ia ka Kalaichar Border Haat naduh ka 30 tarik u Naiwieng, kaba long hadien 2 snem ka jingpyrshang ban iapynbeit hapdeng ki Deputy Commissioner.
Ka Border Haat Managing Commmittee kala pynlong ia ka jingialang hapdeng u Deputy Commissioner ka South Garo Hills Bah Gideon Kharmawphlang bad u District Magistrate ka Kurigram, Bangladesh Md Rezaul Karim hynne ka sngi ha Kalaichar Border Haat ban iapynbeit ia kane ka jingplie ia kane ka iew khappud.
Ia kane ka jingiakren la pynlong ha ka jingiadon ryngkat ki Ophisar na ki bor District ka South Garo Hills ba kynthup ia u Bah Steve Rynjah, Superintendent of Police, u Additional Deputy Commissioners, BADO bad kiwei kiwei bad kumjuh ruh ki Heh Ophisar na Bangladesh, ki Ciustom bad ki Dkhot ka Haat Committee.
Baroh arliang mamla kila mynjur ban plie biang noh ia ka Kalaichar Border Haat naduh ka 30 tarik Naiwieng 2022, ka ban long iew arsien shitaiew kata ha ka sngi nyngkong bad sngi balang.
Baroh arliang mamla ki mynjur ruh ban khaii tang 62 jait ki mar, ban pynkiew ia ki nongshongdukan sha ka 50 ngut, ban pynitynnad ia kine ki iew bad ruh ban maramot ia ki jingker ha kane ka Iew.
Ka jingiakynduh kala rai ruh ba ki Border Haat Committee na baroh arliang ki dei ban shong jingialang la kumno kumno ruh shisien ha ka shisnem.
Ka Kalaichar Border Haat kala khang dam namar ka jingwan lynshop ka khlam Covid bad la rai ruh ba ki mat bala mynjur da ka jingialang ba long ha u Nailur 2019 kin sa treikam noh mardor shisien ba la plie ia kane ka Iew.
