Shillong, Lber 13 : Ka Iingdorbar Thaw Ain ka Jylla ha ka sngi Palei, kala mynjur lang ia ka Meghalaya State Investment Promotion Facilitation (Amendment) Bill, 2025 hadien ka rai jong ka Sorkar ban weng noh ia ka kyntien “pynkha ia ki land-banks lyngba ka jingthied beit beit ia ki jaka na ki trai lane kiwei kiwei ki lad”.
Ia kane ka Bill bala wanrah da u Myntri Rangbah ka Jylla Conrad K Sangma la mynjur da ka jingkyrshan jong ki dkhot na baroh ka Liang Synshar bad Liang Pyrshah, kiba la pdiang bad iaroh ia ka jingkloi jong ka Sorkar ban sngap ia ka sur u paidbah, ha ka sngi kut jong ka dorbar mang tyngka ba 10 sngi ka Iingdorbar Thaw Ain.
Kane kala wan jia ruh hadien ka jingpyrshah kaba jur na baroh ki liang kynthup ki Sengbhalang. Ka KSU kala shim wat ia ka lynti ban tur pyrshah sha Iingdorbar ban dawa ia ka Sorkar Jylla ba kan pyndam ka Meghalaya State Investment Promotion & Facilitation (MSPIF) Act, 2024.
Haba wanrah ia ka Amendment jong ka Bill, u Myntri Rangbah Conrad K Sangma ula ong “Nga sngew kmen ban pyntip ba ngi la wanrah ia kane ka Amendment ha kaba ka kyntien ba ong “pynkha ia ki land bank lyngba ka jingthied jaka beit beit na ki trai” la weng noh khnang ban ai ka khubor kaba shai ba ka Meghalaya Investment Promotion Authority (MPIA) kan nym treikam shuh da ka jingthmu ban pynkha ia ki land bank bad ai jaka sha ki nongkynshew kam”.
“Kan nym don bynta shuh ha ka jingpynkha ia ki land bank ne thied pyllang ia ki jaka lane kano kano ka lynti ban ai pateng lane aiwai ia ki jaka hynrei kan pynleit jingmut beit tang ha kaban iarap wanrah ia ka jingkynshew kam, ban ai ka rynsan kaba la don lupa, kiba pynaram-baroh kine ki kyndon kin iaid kat kum ka rule jong ka ain khnang banin bteng ban wanrah ia ka rukom treikam kaba biang bad ba dei” ula bynrap.
“Kane ka pyni ba kane ka Sorkar kam ju leh da ka bor. Kane ka Sorkar kan sngap ia ka mon bad jingsngewkhia jong u paidbah” ula bynrap.
U Conrad ula kular ruh ia ka Iing ba ka Sorkar kan sa khot ia baroh ki kynhun bapher bapher kynthup ki seng sain pyrthei bad kiwei kiwei ki seng ha ka ban iakren ia ki rule bapher bapher ban sa shna khnang ba kin kren ia ki mat bapher bapher bad ki jingsngewkhia kiba don ha ka ain.
U CM ula pyntip ruh ba kane ka amendment bala tyrwa ruh da ka Sorkar kala pynpaw ba ka MSIPF kan nym pyntroin ia ka Land Transfer Act, baroh ki rukom treikam, ki rule kiba treikam haba phai sha ki ADC ruh yn bud ryntih nalor ka jingthungkam thungkam ia ki briew bad ki samla ka Jylla.
“Kine ki lai tylli ki amendment la wanrah ban pynkmen ia ki nongshongshnong ka Jylla ba baroh ki rule bad ki kyndon kat kum ka Land Transfer Act bad ki Rules jong ki ADC kin dei kiba la bud ryntih” ula ong.
U Conrad ula pyntip shuh shuh b aula iakynduh ia ki MLA bad ki kynhun bapher bapher, kiba la pynpaw ia ka jingsngew halor ka mat ba iadei bad ka land bank.
“Kila don bun ki MLA na ka NPP, kiba la wan bad iakynduh ia nga (kynthup u MLA na Mawkynrew, Jowai bad na Ri-lum Garo) bad MLA ka UDP kiba pynpaw ia ka jingsngewkhia halor kane ka kam land banks ba thmu pynkha da ka MIPA. Dang ha kine ki khyndiat sngi, ki dkhot ka KSU ruh kila iakynduh ia nga bad ngi la batai bniah ia ki ia ki amendment bapher bapher kiba la wanrah ban leh eiei halor ki jingsngewkhia jong ki kynhun bapher bapher. Hynrei wat hadien ba la pynshai, nga dang don jingsngew ba kim pat hun satia haba phai sha ka mat land bank” ula ong.
U Myntri Rangbah ula pynpaw ruh ba ka ju shim por ia ki briew ba kin sngewthuh shai halor ka jingthmu jong ka Sorkar namar ka donkam ia shibun ka jingpule bad ka jingwadbniah bad ong “Hynrei tad haduh kata ka por, kan bha ia ngi kum ka Sorkar ban iatrei jan bad ki paidbah lem bad ka imlang sahlang”.
“Nga la kren ha kane ka Iingdorbar la bun sien ba kane ka Sorkar ka ngeit ha ka jingtrei na ka bynta ka bha ka miat jong ki paidbah jong nga bad kano kano ka rai ba ngi shim, ngin shim na ka bynta ka bha ka miat kaba bun jong u paidbah bad ngin ym artatien ban kynran dien ruh lada donkam” ula bynrap.
Nalor kane, u Myntri Rangbah ula ban jur ba ka thong jong ka MSIPF ka long ban pynsuk ia ka jingkynshew kam hapoh ka Jylla.
 Bill, 2025 hadien ka rai jong ka Sorkar ban weng noh ia ka kyntien “pynkha ia ki land-banks lyngba ka jingthied beit beit ia ki jaka na ki trai lane kiwei kiwei ki lad”.){kind=link}