Shillong, Nailur 30 : Ka Sorkar Assam bad Meghalaya, hynne ka sngi Saitjain, kila rai ban pynbeit noh shuwa khamkloi ia ki lai tylli ki jaka iakajia kiba la pynhap hapoh ka Phase-II jong ka jingiakren pynbeit pud hapdeng ki ar Jylla.
Kine ki jaka ki dei ka Langpih kaba hap ha West Khasi Hills, ka Borduar bad Deshdoomreah kiba hap hapoh Ri-Bhoi District.
Ia kane la pyntip da u Myntri Rangbah ka Assam Himanta Biswa Sarma hadien ka jingialang iakren pynbeit pud bad u Myntri Rangbah ka Meghalaya Conrad K Sangma, ba long hynne ka sngi Saitjain ha Guwahati.
Haba kren sha ki nongthoh khubor, u Himanta ula ong “Ka jingialang kala rai ban pynbeit noh kham kloi ia ki lai tylli ki jaka ba don jingiakajia. Kine ki dei ka Langpih, ka Borduar bad Deshdoomreah sector”.
U Himanta ula ong, “Namar kine ki lai tylli ki jaka ki don shabar jong ka Sixth Schedule, ngi lah ban pynjynsur bad lah ban pynkloi shaid shaid ha kaban pynbeit noh ia ki”.
Hynrei ula ong pat, ba ia ka rukom pynbeit (modalities) yn ieh ha ki Regional Committee jong ki ar Jylla ha kaba la bthah ba kin ai ka jingbatai hakhmat u Myntri Rangbah ka Meghalaya Conrad K Sangma kham kloi kat kaba lah khnang ban lah pynkloi wut wut ha kaban pynkut noh ia ki jingiakajia pud.
U Myntri Rangbah ka Assam ula ong pat “Hooid, ia ka rai kaba khatduh hi yn sa shim ha ka kyrdan jong ki Myntri Rangbah ka Jylla”.
Kumjuh ruh u Myntri Rangbah ka Jylla Conrad K Sangma ula ong, ka jingiakren kila iaid bha na ka bynta ki lai tylli ki jaka ba la bthah ia ki Regional Committee ka Assam bad Meghalaya ba kin pynkloi noh ha kaban shim ia ka rai.
Lah ban kdew hangne, ki lai tylli kiwei pat ki jaka kiba khlem pynpaw eiei na kane ka jingialang, ki dei ka Block-I kaba hap ha West Jaintia Hills bad ka Block-II bad Nongwah-Mawtamur kaba hap ha Ri-Bhoi.
