Shillong, Feb 11: Ka All India Football Federation (AIFF) kala ai ka jingmynjur ban pynlong ia ki artylli ki jingiakhun International Football ha Shillong ia kaba yn iakhun da ka kynhun ialehkai Football jong ka ri India.
Ia kitei ki ar tylli ki jingialehkai yn pynlong ha ka Jawaharlal Nehru (JN) Stadium, Polo.
Ka jingialehkai kaba nyngkong ka dei ka International Friendly ne ka jingialehkai paralok kaban long ha ka 19 tarik u Lber ha kaba ka India kan iakhun pyrshah ia ka Maldives.
Ka jingialehkai ka ba-ar kan dei ka AFC Asian Qualifiers Round, ha kaba ka India kan iakhun pyrshah ia ka ri Bangladesh ha ka 25 tarik u Lber ha ka por 7 baje janmiet.
Kane ka jingai jingmynjur jong ka AIFF kadei hadien ba kala wan ban jurip ia katei ka jaka ialehkai hapoh ka jingialam jongu Myndu Dorji uba long u Match Commissioner jong ka Asian Football Confederation (AFC) ryngkat bad u Abhishek Yadav u Competition Manager ka AIFF.
Kine ki heh ka AIFF kila wan jngoh ia ka nongbah Shillong ha ka 19 bad 20 tarik u Kyllalyngkot ban khmih bniah ia ka jinglong jingman jong ka Stadium ban pynlong ia katei ka jingiakob ialehkai Football.
