T.60000 ki LCS, T.30,000 ki MLA, T.3000 shim ki Thanad Pulit na shi kali
Shillong, Rymphang 18: Uwei u Rangbah na Shillong, ula mudui sha ka Prime Minister Office bad ki Tnad bapher bapher ka Sorkar Pdeng, ba kynnoh donkti ki MLA, ki Land Custom Station (LCS), ki shipai Border Security Force (BSF) lem bad ki Superintendent of Police bad ki Deputy Commissioner, ha ka kam khaii tuh ia ka shini na khappud ka Jylla Meghalaya.
Kat kum ka jingong jong u, kane ka kam khaii tuh ia ka shini kala iaid lyngba ki Land Custom Station (LCS) ka Gasuapara, Borsora, Cherragaon, Dawki bad ka Dalu Land Custom Station.
Une u Rangbah u kyrteng u Bah Adelbert Sohtun, uba shong ba sah ha Pynthorbah, Shillong.
Ha kane ka mudui, une u Rangbah ula kdew ba ka jingshalan ia ka shini shabar ka Ri India ka dei kaba la khein beain kat kum ka DGFT Notification No. 36/2023 ba pynmih ha ka 18 tarik Risaw 2023 ban tehlakam ia ka jingkiew dor ka shini hapoh ka Ri.
Hynrei ula ong ba ha Meghalaya, ka jingkhaii tuh ia ka shini kala shyrkhei bha bad da ki spah tylli ki kali rit bad ki trok kila iaid khaii beain ia ka shini manla ka sngi na ki Land Custom Station kiba don hapoh ka Jylla.
Ula kynnoh ba kine ki trok bad ki kali rit kiba wan na Assam kila siew da ka pisa sha man ki Police Station ba ki iaid lyngba tad haduh ba kin da poi ha kine ki Land Custom Station (LCS) khlem ki kot ki sla.
Ha kane ka mudui, ula kynnoh ba ka dor bala siew sha ki Officer-in-Charge jong ki Police Station ka long haduh T.2500-T.3000 man ki Police Station bad ynda poi ha ki Land Custom Station (LCS) la kynnoh ba kila siew pat haduh T.40,000 ia ki trok heh bad T. 20,000 ia ki trok kiba rit.
Une u Rangbah ula kynnoh ba ia kane ka pisa pat, la iasam bhah hapdeng u MLA ka thain, u Superintendent of Police/Deputy Commissioner, Superintendent of Custom bad ki shipai BSF.
Kat kum ka jingong jong u, u MLA ula shim ia ka bhah ba kot haduh T. 10,000 ia ki trok kit bad T. 20000 ia ki trok heh, ki SP/DC kila shim T. 2000 ia ki kali rit bad T. 4000 ia ki kali heh, u Superintendent of Custom ula shim T.4000 ia ki kali rit bad T. 8000 ia ki kali heh katba ki shipai BSF kila shim T.4000 ia ki kali rit bad T. 8000 ia ki kali heh.
Ula kynnoh ba don ki jaka jaka ba ia ka jinglum pisa la leh hi da ki briew jong ki MLA bad don pat ki jaka jaka bala lum da ki Pulit. La kynnoh ruh ba kine ki MLA kila iapynbeit sopsop bad ki nongkhaii ban pynthikna ba ki lad pathai khubor bad ki riew paidbah kin ym ujor ia kane ka kam khaii tuh sha ki bor ba dei khmih.
Nalor kane, ula ong ba ka rukom pyniaid ia ka khaii tuh ruh ka dei kaba la pynbeit bha bad bun ki briew ba heh ba khraw na Assam bad Meghalaya kila donkti ha kane ka kam khaii tuh ia ka shini.
Ula ong ba kane ka kam khaii tuh kala wanrah ia ka jingduhnong ba kot da ki spah klur ia ka pla tyngka ka Ri nalor ka jingkiew dor ka shini kaba la ktah ia u paidbah.
Ia kane ka jingujor la phah ruh sha u Rohit Yadav, Joint Secretary ka Prime Minister Office (PMO), u Nitin Agarwal , Director General ki shipai BSF, Vivek Joshi Chairman ka Central Board of Indirect tax & Custom Deptt, u Vimal Kumar Srivastava Principal Commissioner ka Central Board of Indirect Tax & Custom, ka Suchitra Sharma CVO & Pr.DG( Vigilance) ka CBIC, Vigilance, u Samanjasa Das Principal Commissioner ka Directorate of International Custom, u Harish Kumar Vashishta Commissioner Investigation (Custom) nalor ki SP, ki DC ka Jylla Meghalaya bad kiwei kiwei ki heh Ophisar na Delhi.
