Shillong, Lber 18 : Ka North East Students’ Organisation (NESO) ha ka sngi Nyngkong kala mudui da ka mukotduma hapoh ka Iingkashari Supreme Court ka Ri India ban pynsangeh ia ka jingpyntreikam ia ka Rules jong ka Citizenship (Amendment) Act, 2019.
“(Ngi) la buh ka jingmudui ha Iingkashari Supreme Court, ba tynruh ia ka Rules jong ka Citizenship (Amendment) Act, 2019 ha ryngkat ka jingkyrpad ia ka Iingkashari ba kan pynmih ia ka hukum ba pynsangeh shuwa ia ka jingpyntreikam” ong u Bah Samuel Jyrwa Chairman ka NESO ha ka kyrwoh bala phah na Delhi.
Shuwa kane, ka NESO kala dep ruh ban buh ia ka jingmudui ha Iingkashari Supreme Court myn ha ka 19 tarik Nohprah, 2019, kaba long pyrshah ia ka CAA, 2019.
“Watla, ka CAA 2019 kala pyllait ia ki Jylla ba treikam ka ILP ba kynthup ia ka Mizoram, Nagaland, Arunachal Pradesh bad Manipur bad ruh ki jaka ba hap hapoh ka Sixth Schedule ba kynthup ia 98% jong ka Meghalaya, 70% jong ka Tripura bad 8 tylli ki District ka Assam hynrei 27 tylli ki District ka Assam kim shym la lait satia, kaba buh ia ka jingma kaba khraw ia ka thain Shatei Lam Mihngi baroh kawei, kaban ktah jur ruh hadien habud” ula ong.
“Kumta ngi la mudui khnang ban iada ia ki Jaidbynriew rit paid jong ka Thain Shatei Lam Mihngi kiba la shah ktah lypa na ka jingrung kyrthep ki briew nabar Jylla bad ki poi ei na Bangladesh” ong u Bah Samuel.
Ula ong ba ka long kaba kongsan ba ka CAA, 219 kam dei ban pyntreikam namar kan nang pynsniew shuh shuh ia ka jinglong jingman bala sniew lypa hapoh ka Thain Shatei Lam Mihngi ka Ri.
