Shillong, Rymphang 13 : Ka kynhun Movement for Change (MFC), kala leit ban mudui sah ki Returning Officer (RO) bad u Deputy Commission ka West Jaintia Hills halor ka jingkynnoh, ba ki don ki Waheh Chnong hapoh West Jaintia Hills, kila leh arsap bad leh shiliang ia ki kyrtong ba iakhun ia ka elekshon MLA-2023.
Ka MFC bala ialam da u Nongtrei mon sngewbha Bah Chandame Sungoh kum u Chief Convenor bad Phermain Samayang, Convenor, kila kynnoh ba kane ka jingleh arsap bad jingleh shiliang jong ki Waheh Chnong ia ki Kyrtong kala jia ha ki saw tylli ki Constituency kiba hap hapoh ka West Jaintia Hills.
Kine ki constituency ki dei ka 1-Nartiang constituency, 2-Jowai constituency, 3- Raliang constituency bad 4-Mowkaiaw constituency.
Kat kum ka jingong kine ki Nongialam, ka Movement for Changne (MFC) kala ïoh ïaka jing ujor naki paidbah bad wat naki kyrtong baki Waheh Chnong ki lehbor ban thombor ïaka hok jong ki.
“Haba wan ki Candidate kiba bun pisa kiba kham bun nongbud te ki pynkyrpang bha ïaki jingpynkhreh, ki jingpyntip hapoh shnong poh thaw bad ki rukom kren rukom pynïaid meeting, hynrei lada wan pat ki candidates ki bym don pisa ki bym don nongbud, wat tang ka jingtip ruh kim ïa ai hapoh shnong poh thaw” kila kynnoh.
“Ym don Nongshongshnong ruh ba wan sngew wan sngap bad ka rukom pynkhreh, ka rukom pyniaid bad ka rukom krem jingialang ruh ki pyniapher bad leh arsap bha” kila bynrap.
Ka MFA ka ong ba kane ka jingleh jong ki Waheh Chnong ka long kumba i beiñ bad iuhroit ïaka hok jong ki wei pat ki party bad ki kyrtong.
“Kum ki Waheh Chnong kim dei ban iashah liang lane leh arsap ïakino kino ki Party lane ki kyrtong namarba maki ruh ki don kahok ban pynsngew pynsngap ïaki nongrim bad ki jingmut jingthmu jong ki .Ki paitbah ruh ki don kahok ban sngew ban sngap ïaki jingkren ki nongrim bad ki jingmut jingthmu jong ki Party bad ki kyrtong. Kane ka jingleh shiliang bad jingleh arsap jong ki ka pynkheiñ ïaki hok jong ki Party ki kyrtong bad ïaka Model Codes of Conduct” kila ong.
Halor kane, ka Movement ka kyrpad jur iaki Returning Officers bad ïa u Deputy Commissioner ban shim khia ïakane ka kam. Ka kyntu ruh ïaki Waheh Chnong baroh ba kim dei ban pynpaw ïa kum kane ka jingleh arsap bad jingleh riewkhlaw jong ki.
“Lada ka Movement ka dang lap ïaki Waheh Chnong kiba leh ïa kum kine ki kam arsap, kan leit ujor shi syndon sha u Chief Election Officer (CEO) ka Jylla” kala maham.
