Shillong, K’lyngkot 17: Ka KSU West Jaintia Hills District hynne ka sngi Baar kila leit ban mudui hakhmat u Deputy Commissioner ka West Jaintia Hills iaka jing kynnoh tei be-aiñ ka sorkar Assam iaka Beat Office jong ka tnad Forest ha Mukroh bad ka jingpynjulor ia ki lyngkha jong ki nongrep ka thain.
Ka KSU-WJHD hapoh ka jingialam jong u President samla Laitphar Syngkrem bad u General Secretary samla Leningrad Tariang kila iakynduh ia u DC hadien ba kila lap ba ka sorkar Assam kala tei be-ain iaka ophis jong ka tnad Forest ha Mukroh bad shna ia ka surok sha Samatan bad kala pynjulor ia ki lynti leit lyngkha jongki paidbah da kaba tih da ki thliew bad pynkhyllem da ki diengbah hapdeng lynti.
Ka KSU-WJHD kala iathuh ba na ka liang u DC ula pynpaw ba ula tip ia kane bad ula kular ban shimkhia ha kaban iakynduh bad ka DC jong ka Karbi Anglong bad ia u DIG jong ka Karbi Anglong ha ka 27 tarik mynta u bnai ban iakren ia kiei kiei kiba jia ha kine ki sngi kiba lah dep bad ruh ban khanglad ia ka Assam ban nym wan pyndik ne tuklar shuh shapoh ka jylla.
Ki nongialam ka KSU kila pynpaw ba kin ap ia katei ka sngi ban iakren hapdeng ka Assam bad Meghalaya bad lada ka jingiakren kam seisoh bad lada ka sorkar Assam kan iai bteng ban pyndik ia ki paid nongshong shnong jongka Bri Hyññiewtrep kiba shong basah sha ki thaiñ khappud (Block-I), ka seng kam banse ban shim da kiwei pat ki lad ki lynti bad ka sorkar kadei ban shim ia ka jingbahkhlieh.
