Shillong, Nohprah 13 : Ka Synjuk jong ki Seng ki Briew ba don jingduna dkhot met- ka Federation of Persons With Disabilities (FPWD) kala mudui sha ka Meghalaya Human Rights Commission (MHRC) pyrshah ia u kyrtong ka Indian National Congress (INC) na Sohiong Constituency halor ka jingkynnoh ba u kynthoh niewbein ia ki briew ba duna dkhot met.
Kane ka synjuk kala aiti ia kane ka jingujor ha ka 9 tarik u Nohprah sha u Chairman/Secretary ka MHRC bad ia kane kajuh ka jingujor la ai ruh sha ka Commissioner for Person with Disabilities, ba kyntu ban kin leh da kaba tyngeh ia une u kyrtong iakhun elekshon MLA ka Congress na Sohiong.
Kat kum kane ka jingujor bala soi da u Chairman Bah Ferdinand L Marshillong bad General Secretary kong Ibadalin Kharbuli, kane ka Synjuk kala iathuh ba une u kyrtong ka Congress u dei u Bah Sein Osborn Kharjana uba la kren pyrshah ia ki briew ba duna dkhot met ha kawei na ki jingialang paidbah ba long dang shen ha Sohiong kaba ong:- “Nga ju ong ia kane kawei ka ktien ba, haba ngi jied ia u Rangbah Shnong, phi ju jied ia uba matlah u rangbah shnong dei ne em? phi ju jied ia uba kyllut? ngin nym jied ia uba kyllut ngin nym jied ia uba kyllut, ia u bym nangkren, ia u bym lait kren ruh em balei phim jied ia uba matlah, ia uba kyllut ia u bym lait kren balei ym jied? kadaw ka long ba u don jingduna ha ka dkhot met bad ngi tip hi ruh ba um lah ban synshar, kata ka dei ka jingjia barabor” .
Haba pynpaw ba kane ka jingkynthoh une u Rangbah ka dei ka jingpynkhein ia ki kyndon jong ka Chapter II bad XVI jong ka Rights of Persons with Disabilities Act, 2016, ka FPWD “Khnang ban tehlakam ia ki riew shimet n ki kynhun ban niew bein ia ki briew ba kum ma ngi, ngi kyrpad ia ka MHRC bad ka Commission for Person with Disabilities ban shimkhia ia kane ka kam bad ban ai noh kham kloi ia ka jingbishar kaba dei.
Ha kane ka jingujor, ka FPWD kala aiti ruh ia ki video bala ring ia ka jingkren jong une u kyrtong ka Congress.
