Shillong, Rymphang 14: Ka Congress hynne ka sngi Baar, kala leit ujor sha u Chief Electoral Officer (CEO) ka jylla Bah FR Kharkongor pyrshah iaka Chairperson ka Meghalaya State Commission for Women (MSCW) Kong Phidalia Toi halor ka jingkynnoh iashimbynta haka Election Rally jong u kyrtong ka NPP na Jowai Bah Wailadmiki Shylla.
La kynnoh ba ka kong Phidalia Toi kala iashimbynta ha ka rally ban synran ia u bah Wailadmiki ha ka jingleit thep kyrteng kum u kyrtong ban iakhun ia ka elekshon MLA ban long la 27 tarik.
Ka President jongka Mahila Congress ka Kong Joplyn Scott Shylla kala ong, “Ngi la wan ujor ha u CEO pyrshah iaka Kong Phidalia Toi ba kala don bynta ha ka jingleit synran ia u Kyrtong ka NPP na Jowai ban thep kyrteng hakhmat u Returning Officer”.
“Ngi la dawa ba dei ban weng noh mardor iaka Kong Phidalia naka kam kum ka Chairperson jong ka MSCW bad dei ban (Disqualify) mait kyrteng noh ia u kyrtong ka NPP Bah Wailadmiki Shylla namar kila pynkheiñ iaka Model Code of Conduct (MCC) bad iaka Representation of People Act 1951” ong ka Kong Shylla bad ka AICC Media Coordinator, ka Bobbeeta Sharma.
Ki nongialam ka Congress kila iathuh ruh ba kila dawa na u CEO ba u dei ban shimkhia halor ka jingtah ia ki Poster jong u Myntri Rangbah duh ka ri bad u Myntri Kam Pohiing ka ri, kiba la tah ha ki ophis sorkar bad ha ki post elektrik sorkar kaba long ka jingpynkheiñ iaka Election Code of Conduct bad kila dawa ba dei ban weng noh mardor ia kitei ki poster.
Kila iathuh ba na ka liang u CEO ula kular ban shimkhia ia kine ki jingujor jong ka seng bad ba yn sa leh ia kaba donkam bad ki kyrmen skhem ba ka Election Commission kan shimkhia mardor ia kine ki jingpynkheiñ baroh.
