Shillong, Kyllalyngkot 10: Ka All Khasi Hills Achik Federation kala pynpaw iaka jingsngewkhia pyrshah iaki nongtrei jong ka Ranikor CHC kiba la pep trei kput khlem da pyndep iala ka kamram.
Ka Federation kala ioh pdiang ia kiba bun ki jingujor na ki paidbah kiba sah ha ki thain khappud jong ka Ranikor, South West Khasi Hills ba ki Doctor bad ki nongtrei ka CHC ki la pep trei mynta la bun taiew bad kane ka la buh ha ka jingeh kaba khraw ban ioh iaka jingsumar haba ki pang ki shitom.
Ki don da ki spah tylli ki shnong kiba hap ha katei ka CHC ban ioh iaka jingsumar hynrei kumba long haduh mynta ym don satia ki nongpeit iaki nongpang.
Namar ka jingshem jingeh jong ki Paid nongpang, ka Federation ka dawa ba dei ban pynbiang mardor ia ki nongai jingsumar bad nongtrei ha Ranikor CHC khnang ba kin ioh ban ai jingsumar mardor iaki paidbah ym ban pyndik shuh ia u paidbah.
