Shillong, Naiwieng 10 : Ka North Eastern Hill University (NEHU) kala sakhi ia ka jingbym don shuh ka suk ka sain katba ka jingiakhih jong ki samla pule ka la jam sha ka sngi kaba hynriew hynne ka sngi U Blei.
Ka Iingsah jong u Vice Chancellor ka NEHU Prof PS Shukla kala shah lun maw hynne ka step phyrngap ha ka kynhun ki riew runar ki bym lah satia ban ithuh, kiba la lynthem maw ruh wat ia ka kali kaba pynieng ha phyllaw ka iing sah.
Kane ka jingjia kala jia hynne ka step phyrngap sngi U Blei hapdeng ka jingiashong shah thngan jong ki samla pule bala ialam da ka NEHUSU bad kyrshan da ka KSU-NEHU Unit, kiba dawa ia u VC ban hiar shuki mardor nalor ban wengkam ia u Regsitrar bad Deputy Registrar.
Kat haduh ba thoh ia ka khubor, ym shym la lah satia ban tip shano ba u Vice Chancellor ula leit.
“U Acting Registrar ula mudui da ka ejahar halor kane ka jingjia bad ki Pulit kila register case halor kane ka jingjia” ong u SP (City) Dara Ashwagosh haba pyntip ba ki Pulit kila phah ia ka kynhun pahara ban pahara ia ka iingsah u Vice Chancellor.
Haba kylli, u SP ula ong ba u VC um shym la don satia hala ka jong ka iingsah ha ka por ba shah hiar thma ha ki riew runar.
“Haba leit jurip ia kane ka jaka ba jia, um (VC) shym la don satia ha katei ka jaka” ula ong haba bynrap ba ki Pulit ki dang tohkit ia kane ka jingjia bad ruh shaei ba u VC u don. Ula ong b aka jingtohkit ka dang iaid shakhamt bad ym pat shym la lem briew satia iano iano ruh halor kane ka jingjia.
Shuwa kane, u SP nalor ki District Magistrate kila khang ia ki samla pule ban pynlong ia ka jingiaid paidbah ba jai jai lyngba ka Iingsah u Vice Chancellor.
Ia kane ka jingiaid paidbah ba jai jai la pynlong da ka Research Scholar Forum of NEHU kiba kyrshan ia ka jingdawa jong ki samla pule ba iakhih.
U President ka Research Scholars Forum NEHU, Superior Syngkli ula kynnoh ba u VC ula jah rngai naduh hynnin ka miet.
“U Chief Security Office jong u VC ula kular ha ngi ba yn sa ujor ejahar naba u VC ula shu jah rngai khlem da aplai ia ka shuti” ong u Syngkli.
U Syngkli ula ong ba ki research scholars kila ai ia ka jingkyrshan ba pura ia ka NEHUSU kiba dawa ia u PS Shukla ban hiar shuki noh kum u Vice Chancellor ka skulbah.
 kala sakhi ia ka jingbym don shuh ka suk ka sain katba ka jingiakhih jong ki samla pule ka la jam sha ka sngi kaba hynriew hynne ka sngi U Blei.){kind=link}