Shillong, Rymphang 24: U Myntri Rangbah ka Jylla Narendra Modi, ula kynnoh ba ki don katto katne ki Political Party kiba pynkha da shi-ing shisem, kila pyndonkam ia ka Meghalaya bad kiwei ki Jylla ka thain Shatei Lam Mihngi kum ka ATM.
U Myntri Rangbah Duh ula kren ia kane ha ka rynsan ialap elekshon ba long hynne ka sngi ha Khyndailad, Shillong, ban pan jingkyrshan ia ka BJP ha kane ka elekshon MLA ka ban long la 27 tarik Rymphang.
Da ki hajar ngut ki paidbah bad ki nongkyrshan ka seng BJP kila pdiang burom ia u Myntri Rangbahduh ka ri ha ka por ba u wan poi ha nongbah Shillong ban iashimbynta ha ka Roadshow ba nyngkongeh hapoh ka Jylla.
Haba ai jingkren haka jingialang kaba la dap smam da ki hajar ngut ki paidbah, hadien bala dep iaid iaka ‘Road Show’ ha nongbah Shillong, u Modi ula kyntu ia ki paidbah ba kin vote iaka BJP khnang ba kan lah ban trei na ka bynta ki paidbah ka jylla.
Ula kynnoh ba ki don ki longiing longsem ha ka kam sain pyrthei kiba la pyndonkam iaka Meghalaya bad kiwei pat ki jylla jong ka thain Shatei Lammihngi kum ka ATM ban khniot bad shimkabu ia ka jingdon jingem jong ka thaiñ hynrei ka BJP ka shim ba ki 8 tylli ki jylla haka thain shatei lam mihngi kum ka ‘Ashtalakshmi’ (Phra jait ka Blei Lakshmi) bad ka trei naka bynta ka jingsuk bad ka roi ka par.
“Dei na kane ka daw ba ki paidbah ka Meghalaya bad ka thain shatei lam mihngi baroh kawei ki kwah ba ka BJP kan synshar ia ki khnang ba ka bha ka miat, ka roi ka par bad ka jingsuk kin long kiei kiei kiba buh hakhmat eh ban iaka bha ka miat jong ki katto katne ki longiing” ong u Modi.
“Haka jingiaid iaka Road Show ha kane ka nongbah kaba itynnad, nga iohi shai kdar ba ka Meghalaya ka kwah iaka BJP. To ailad ba ka BJP kan synshar ia phi, khnang ba nga uba don haka kyrdan kaba heh ngan ioh ban ai iaka jingshakri iaka Meghalaya napoh New Delhi” ong u Myntri Rangbahduh ka ri.
Ula pynpaw iaka jingskhem jingmut ba ki paidbha ka Meghalaya bad kathain shatei lam mihngi hi baroh kawei mynta ki don lang bad ka BJP.
Ka sngi ban thep vote haka jylla ban jied ia ki MLA kiba thymmai kan long haka 27 tarik mynta u bnai bad haka 2 tarik u Lber kadei ka sngi ban niew iaka vote bad ban pynbna iaka resol.
