Aizawl, Nailar 25 : Ka Ministry of Railway ka Sorkar Pdeng, kala thaw ia ka High-Level Committee ka ban tohkit halor ka jingkhyllem jong ka jingkieng lynti rel ha Mizoram.
Ha kane ka jingkhyllem ka jingkieng, 23 ngut ki nongtrei kila iap na ka jingshah bhen ha ka jingtei, kaba don ha ka shnong Sairang marjan ka Aizawl. Kane ka jingjia kala jia ha ka 23 tarik Nailar.
Ka jingtohkit jong ka High Level Committee kan long beit thik tang halor ki daw ka jingkhyllem ka jingkieng bad ia kane ka kynhun tohkit yn khlieh da u BP Awasthi, PED-II, RDSO.
Kiwei pat ki dkhot ka Committee ki kynthup ia ka Dr. Dipti Ranjan Sahoo, associate dean bad professor ka structural engineering at IIT-Delhi; Sharad Kumar Agarwal, professor of bridges ha IRICEN; bad Sandeep Sharma,chief bridge engineer ka Northeast Frontier (NF) Railway.
Ka Sorkar kala aipor shibnai ia kane ka committee ba kan aiti ia ka kaiphod jingshem na ka jingtohkit.
